लहान मुलांची तब्येत बिघडली; ओपीडीमध्ये तिप्पट वाढ!

चंद्रपूर : कोरोनाची तिसरी लाट येण्याची शक्यता तज्ज्ञांकडून व्यक्त होत असतानाच लहान मुलांच्या आरोग्याच्या समस्या वाढल्या आहेत. जिल्हा सामान्य रुग्णालयातील ओपीडीसह खासगी रुग्णालयांच्या ओपीडीमध्ये मोठ्या प्रमाणात रुग्ण दिसून येत आहेत. यामध्ये जीवघेण्या तापाचेसुद्धा रुग्ण असल्याने काळजी घेण्याचे आवाहन बालरोग तज्ज्ञांनी केले आहे.

दरवर्षी पावसाळ्यात लहान मुलांना सर्दी, खोकला, ताप ही लक्षणे दिसून येतात. मात्र मागील वर्षी आलेल्या कोरोनाने दहशत पसरली आहे. तिसऱ्या लाटेचा धोका लहान मुलांना होण्याची शक्यता वर्तविण्यात येत आहे. त्यातच डेंग्यू, मलेरिया, मेंदुज्वर आदी प्राणघातक तापाचे रुग्ण आढळून येत आहेत. जिल्हा सामान्य रुग्णालयासह खासगी ओपीडीतसुद्धा रुग्ण वाढले असल्याचे दिसून येते.

बॉक्स

बालरोगतज्ज्ञ म्हणतात..

पावसाळ्यात सर्दी, खोकला, ताप आदी समस्या लहान मुलांना जाणवतच असतात. परंतु, आता डेंग्यू, मेंदुज्वर, मलेरिया अशी जीवघेण्या आजाराचे रुग्णसुद्धा मोठ्या प्रमाणात आढळून येत आहेत. कुटुंबीयांनी काळजी घेतली तरी प्रशासनाकडूनही या जीवघेण्या तापाचा बंदोबस्त करण्यासाठी उपाययोजना करणे गरजेचे आहे. मेंदुज्वर हा अत्यंत भयावह आहे. यामध्ये बाळ दगावण्याची किंवा वेळीच उपचार न झाल्यास मतिमंद होण्याची शक्यता असते. त्यामुळे त्याचे लसीकरण गरजेचे आहे. गडचिरोलीसारख्या जिल्ह्यात मागील काही वर्षांपासून लहान मुलांना मेंदुज्वराचे लसीकरण करण्यात येत आहे. परंतु, आपल्या जिल्ह्यात अशी कुठल्याही प्रकारची योजना राबविताना दिसून येत नाही.

- डॉ. अभिलाषा गावतुरे, बालरोगतज्ज्ञ, चंद्रपूर

बॉक्स

डेंग्यू, मलेरिया चाचणी

शासकीय रुग्णालयात तसेच खासगी रुग्णालयातील ओपीडीमध्ये येत असलेल्या लहान मुलांमध्ये सर्दी, खोकला, हगवण, साधा ताप यासह डेंग्यू, मलेरिया या जीवघेण्या आजारांची लक्षणे आढळून येत आहेत. त्यामुळे संशयित लक्षणे असताच डाॅक्टरांकडून डेंग्यू, मलेरियाची चाचणी करावयास सांगितले जात आहे. सद्यस्थितीत जिल्हा सामान्य रुग्णालयासह खासगी रुग्णालयात गर्दी दिसून येत आहे.

बॉक्स

संशयितांची कोरोना चाचणी

शासकीय किंवा खासगी रुग्णालयात उपचारासाठी आलेली मुले संशयित आढळून आल्यास त्यांची कोरोना चाचणी करण्यात येते.

शक्यतो मोठ्या माणसांपासून लहान मुलांना कोरोना होण्याची शक्यता असते. त्यामुळे काळजी घेण्याचे आवाहन बालरोग तज्ज्ञांनी केले आहे.

बॉक्स

..ही घ्या काळजी

ताप, सर्दी, खोकला अशी लक्षणे आढळल्यास डॉक्टरांचा सल्ला घ्यावा. सायंकाळच्या सुमारास झोपताना मच्छरदाणीचा वापर करावा. घरात कुणाला ताप आला असेल तर त्यांच्यापासून लहान मुलांना दूर ठेवावे.