कोरोनाचा शिरकाव होऊ न देण्याचा गावकऱ्यांचा निर्धार

सचिन सरपटवार

भद्रावती : कोरोनाच्या पहिल्या लाटेची तीव्रता कमी होत नाही, तोच दुसऱ्या लाटेने थैमान घातले अन् लगेच तिसऱ्या लाटेचीही चाहूल लागली. अशातच भद्रावती तालुक्यातील भटाळी ग्रामपंचायतीसह अन्य सुमारे पंधरा ग्रामपंचायतीच्या विविध गावांमध्ये कोरोनाचा अद्यापही शिरकाव झालेला नाही. कोरोना नियमांचे पालन करीत सकारात्मक भावनेच्या बळावर या गावांनी कोरोनाला दूर ठेवले. कोरोना नियंत्रणासाठी ग्रामपंचायतीमध्ये एका कमिटीची स्थापनाच करण्यात आल्याचे भटाळी ग्रामपंचायतीचे सरपंच सुधाकर रोहणकर यांनी सांगितले.

भटाळी ग्रामपंचायतअंतर्गत भटाळी, नंदुरी खुर्द, नांदुरा ही तीन गावे असून अंदाजे लोकसंख्या नऊशे ते हजार इतकी आहे.

कमिटीच्या द्वारे सुरुवातीलाच गावांमध्ये फवारणी करण्यात आली. सॅनिटायझरचा वापर करण्यात आला. डॉक्टर नंदकिशोर, तसेच आशा वर्कर्स, शिक्षक, ग्रामसेवक यांच्या माध्यमातून गावातील प्रत्येक घरी जाऊन नागरिकांची ऑक्सिजन लेवल व ताप तपासण्यात आला. सरपंच रोहणकर हे स्वत: उपस्थित राहत होती. ऑक्सिजन लेवल ९०च्या आत असेल, तर सरपंचांना त्वरित माहिती देऊन रुग्णाची टेस्टिंग करण्यात येत आहे. बाहेरच्या लोकांना गावामध्ये प्रवेश देण्यात आला नाही. या गावांमध्ये सरपंच यांच्या उपस्थितीत बोटावर मोजण्याइतक्या लोकांच्या उपस्थितीत लग्न लावण्यात आले.

४५ या वयोगटांतील जवळपास सगळ्याच नागरिकांच्या लसीकरणाचा पहिला डोस या ठिकाणी पूर्ण झाला आहे. प्राथमिक आरोग्य केंद्रात ऑक्सिजनची व्यवस्था करण्यात आली आहे. या गावांमध्ये कोरोनाचा शिरकाव होऊ देणार नाही, असा निर्धार सरपंच सुधाकर रोहणकर यांच्यासह गावकऱ्यांनी ठाम निर्धार केला आहे.

टाकळी बेलोरामध्ये कोरोनाला प्रवेश नाही

टाकळी ग्रामपंचायतीमधील बेलोरा गावातही कोरोनाचा शिरकाव नसल्याचे टाकळी ग्रामपंचायत उपसरपंच प्रवीण बंदुरकार यांनी सांगितले. ग्रामपंचायतकडून ग्रामस्थांना प्रत्येकाला मास्क व सॅनिटायझर देण्यात आले. गावांमध्ये फवारणी बाबतीत विशेष काळजी घेत असल्याचे त्यांनी सांगितले.

पाच ठिकाणी विलगीकरण केंद्र

तालुक्यात चंदनखेडा मुधोली, माजरी, नंदुरी, घोडपेठ या ठिकाणी विलगीकरण केंद्र चालू आहे. चंदनखेडा विलगीकरण केंद्रात १६ रुग्ण भरती होते. त्यापैकी पाच रुग्णांना डिस्चार्ज देण्यात आला. एकूण २४ उपकेंद्रांवर लसीकरणासाठी टीम तयार करणार आल्या आहे.

मुधोली क्षेत्रातील ग्रामस्थांनी लसीकरणासाठी पुढे यावे

तालुक्यातील विविध क्षेत्रांत लसीकरण याचे प्रमाण चांगले आहे. मुधोली क्षेत्रात त्या प्रमाणात लसीकरण कमी प्रमाणात होत आहे. कोणत्याही अफवांना बळी न पडता, मनात भीती न बाळगता ग्रामस्थांनी मोठ्या प्रमाणात लसीकरण करावे.

- डॉ.संजय आसुटकर, भद्रावती.

कोरोना नियमांचे पालन करा

तालुक्यात अनेक गावांत कोरोनाचा अद्यापही शिरकाव झाला नाही, ही खरच आनंदाची बाब आहे. ज्या गावांमध्ये कोरोनाचा शिरकाव झाला नाही, त्या गावांचे अन्य ग्रामस्थांनी अनुकरण करावे. कोरोना नियमांचे पालन करावे.

- महेश शितोळे, तहसीलदार भद्रावती.