चालकाचे नियंत्रण सुटले अन चारचाकी घरात घुसली

: विठ्ठलवाडा बसस्थानकानजीकची घटना

वढोली : चालकाचे वाहनावरील नियंत्रण सुटल्याने चारचाकी घरात शिरल्याची घटना शुक्रवारी दुपारी २ वाजताच्या दरम्यान विठ्ठलवाडा बसस्थानकानजीक घडली.

मात्र जीवितहानी न झाल्याने मोठा अनर्थ टळला. गोंडपिपरी-तालुक्यातील विठ्ठलवाडा मार्गावर वाहन क्र. यूपी ९३ बीडी ७४०२ ही चारचाकी गोंडपिपरीमार्गे गडचिरोली जिल्ह्याच्या दिशेने आष्टीकडे जात होती. अशातच चालकाचे वाहनावरील नियंत्रण सुटले. अन चारचाकी वाहन रस्त्यानजीक एका घरात घुसले. ही घटना विठ्ठलवाडा गावाजवळ घडली. गावच्या बसस्थानकाजवळ सिंधूबाई सरवर यांचे विटा- कवेलूचे कच्चे घर आहे. हे वाहन इतके भरधाव वेगात होते की रोडच्या कडेला उतरून थेट घराच्या मागील बाजूस असलेल्या भिंतीला भगदाड पाडून चारचाकी घरात घुसली. त्यात सरवर यांच्या घराचे मोठे नुकसान झाले आहे. या घटनेने सरवर कुटुंब उघड्यावर आले आहे. लागलीच या घटनेची माहिती गोंडपिपरी पोलीस स्टेशनला कळविण्यात आली. यानंतर पोलीस कर्मचारी घटनास्थळी दाखल झाले. पुढील तपास ठाणेदार संदीप धोबे यांच्या मार्गदर्शनात पाणेकर, कोवे करीत आहेत.