दारुड्या मुलाचा आईसह पत्नीवर कुऱ्हाडीने प्राणघातक हल्ला, पळसगाव येथील थरारक घटना

जंगलात फरार झालेल्या आरोपी मुलाला अटक

चंद्रपूर : मद्यधुंद मुलाने आई व पत्नीवर कुऱ्हाडीने हल्ला केल्याची खळबळजनक घटना चिमूर तालुक्यातील पळसगाव (पिपर्डा) येथे बुधवारी (दि. ९) सकाळी ८ वाजण्याच्या सुमारास घडली. पार्वता संभा मेश्राम व कल्पना मेश्राम अशी जखमींची नावे आहेत. हल्ल्यानंतर जंगलात पळालेल्या आरोपी मुलाला पोलिसांनी मोठ्या शिताफीने अटक केली. अरविंद संभा मेश्राम असे आरोपीचे नाव आहे. जखमी आईला जिल्हा सामान्य रुग्णालयात हलविण्यात आले आहे.

पळसगाव येथील अरविंद मेश्राम हा बुधवारी सकाळी दारू पिऊन घरी आला. पत्नी कल्पना ही घरातील कामे करत होती. दरम्यान, शिवीगाळ करून पतीने तिला मारहाण सुरू केली. सुनेच्या मदतीसाठी आई पार्वता मेश्राम आडवी आली असता दोघींवरही कुऱ्हाडीने हल्ला केला. या घटनेत पतीला किरकोळ तर आई गंभीर जखमी झाल्याचे पाहून आरोपी मुलगा जंगलात पळाला. पत्नीने या घटनेची तक्रार पोलिसात केली. पोलिसांनी जखमी आईला तातडीने चिमूर रुग्णालयात दाखल केले.

आरोपी जंगलात पळाल्याची माहिती मिळताच चिमूर पोलिसांचे पथक सज्ज झाले. गुप्त माहितीच्या आधारे आरोपी विहिरगाव येथील बसस्थानक परिसरात असल्याचे कळताच त्याला ताब्यात घेण्यात आले. भादंवि ३०७, ३२४, ७०४, ५०६ अन्वये गुन्हा दाखल करून अटक केली.

पार्वता मेश्राम यांची प्रकृती गंभीर असल्याने जिल्हा सामान्य रुग्णालयात दाखल करण्यात आले. पुढील तपास पोलिस उपनिरीक्षक नीलेश चावरे, विनोद जांभुळे, बिट अंमलदार मेहरकुरे, पोलिस शिपाई भरत गोडवे, दगडू सरवदे करत आहेत.

पळसगाव येथील हल्ला प्रकरणातील आरोपीला अटक केली. उद्या न्यायालयात हजर करण्यात येईल. हल्ल्यात गंभीर झालेल्या पार्वता मेश्राम यांना पुढील उपचारासाठी जिल्हा सामान्य रुग्णालयात दाखल करण्यात आले.

- मनोज गभने, ठाणेदार, चिमूर