शासकीय सार्वजनिक जागेवरील अतिक्रमण हटवावे

सावरगाव : नागभीड तालुक्यातील वाढोणा येथील शासकीय सार्वजनिक जागेवर गावातील लोकांनी बेकायदेशीररित्या अतिक्रमण केल्याने ते हटवावे, अशी मागणी येथील हमारा गाव राजकीय पक्षविरहित संघटनेने केली आहे.

शासकीय सार्वजनिक सभागृहाजवळील अतिक्रमण तसेच शासकीय नर्सरीची जमीन अतिक्रमण करून गिळंकृत केली आहे. हमारा गाव संघटनेनेच्या पदाधिकाऱ्यांनी सोमवारी ग्रामपंचायत कार्यालयात सभा बोलावली व दिलेल्या निवेदनांबद्दल विचारणा केली असता सरपंच देवेंद्र गेडाम यांनी जिल्हाधिकारी यांच्या शासकीय जमिनीवरील अतिक्रमण हटविण्याबाबतचा आदेश दाखविला. लवकरच संबंधित अतिक्रमणधारकांवर कारवाई करण्यात येईल, असे आश्वासन दिले. या वेळी सरपंच देवेंद्र गेडाम, उपसरपंच भगवान बनसोड, ग्रामपंचायत सदस्य प्रदीप येसनसुरे व वासुदेव मस्के, हमारा गाव संघटनेचे अध्यक्ष रुपेश डोर्लीकर सचिव विनायक आंबोरकर, बिराजी कोमावार, प्रमोद ठाकुर, बाबा भीमनवार आदींची उपस्थिती होती.