प्रधानमंत्री शेतकरी सन्मान योजनेपासून शेतकरी वंचित

कोरपना : तालुक्यातील जेवरा येथील अनेक शेतकरी प्रधानमंत्री शेतकरी सन्मान योजनेपासून वंचित असून याकरिता भारतीय जनता युवा मोर्चाचे जिल्हा उपाध्यक्ष आशिष ताजने यांच्या नेतृत्वात कोरपना तहसील कार्यलयावर धडक देऊन नायब तहसीलदार प्रवीण चिडे यांना, जेवरा गावातील नागरिकांना प्रधानमंत्री शेतकरी सन्मान योजनेचा लाभ तात्काळ देण्यात यावा, याकरिता निवेदन देण्यात आले.

तालुक्यातील जेवरा गावातील नागरिकांना यापूर्वी प्रधानमंत्री शेतकरी सन्मान योजनेचे हप्ते सुरळीतपणे मिळत होते. परंतु एप्रिल २०२१ ते जुलै २०२१ चा हप्ता अजूनही मिळालेला नाही. त्यामुळे अनेक नागरिक सदर योजनेच्या लाभापासून वंचित होते. गावातील शेतकऱ्यांनी सदर प्रकरण भाजयुमो जिल्हा उपाध्यक्ष ताजने यांच्या निदर्शनास आणून दिले. त्यांनी सदर प्रकरणाची दखल घेत तहसील कार्यालय येथे सर्व शेतकऱ्यांना घेऊन नायब तहसीलदार यांना निवेदन दिले. आपण या प्रकरणाची माहिती घेऊन शेतकऱ्यांना तत्काळ लाभ मिळविण्यासाठी उचित कार्यवाही करू, असे नायब तहसीलदार प्रवीण चिडे यांनी सांगितले.

यावेळी बंडू गोंडे, घन:श्याम ताजने, उरकुडा आत्राम, भारत मेश्राम, योगीराज मेश्राम, बाबराव मेश्राम, रमेश कोटनाके, विठ्ठल मेश्राम उपस्थित होते.