चारचाकी वाहनाने तीन वर्षीय बालकाला चिरडले

चिमूर : शहरातील मासळ मार्गावरील वाल्मीक चौक येथे रस्त्यावर खेळत असलेल्या तीन वर्षीय बालकाला मासळकडून येणाऱ्या चारचाकी वाहनाने चिरडले. तत्काळ बालकाला दवाखान्यात नेण्यात आले. मात्र उपचारादरम्यान त्याचा मृत्यू झाला. ही घटना गुरुवारी दुपारी २ वाजतादरम्यान घडली.

धीरज शंकर भानारकर (३) रा. गुरुदेव वाॅर्ड, वाल्मीक चौक, चिमूर असे मृत बालकाचे नाव आहे. चिमूर- मासळ रोडवरील शहरालगत असलेल्या वाल्मीक चौकात रस्त्याच्या कडेला धीरज खेळत होता. चावडी चौक येथून येणाऱ्या चारचाकी वाहनाने (एमएच ३४ एम ९३५५) धडक दिली. यात धीरज भानारकर गंभीर जखमी झाला. गाडी चालक व मालकाने त्या बालकाला उपचारासाठी उपजिल्हा रुग्णालय चिमूर येथे दाखल केले. मात्र उपचारादरम्यान त्याचा मृत्यू झाला. पोलिसांनी घटनेचा पंचनामा करून मुंबई मोटर व्हेईकल ॲक्टनुसार गुन्हा दाखल करून गाडी चालक सतीश इंदूरकर याला अटक केली आहे. पुढील तपास चिमूर पोलीस करीत आहेत.