गुरुजी तुम्हीसुद्धा... चंद्रपुरात शिक्षकच निघाला गांजा तस्कर

१२० किलो गांजासह दोघांना अटक, गुन्हे शाखा पथकाची कारवाई

लोकमत न्यूज नेटवर्क
चंद्रपूर : विद्यार्थ्यांना घडविणारा शिक्षकच खुद्द विद्यार्थ्यांना गांजा देत त्यांचे आयुष्य व्यसनात गुरफटत असल्याचा प्रकार उघडकीस आला आहे. अध्यापनाचे पवित्र कार्य साेडून गांजा तस्करी करणाऱ्या या शिक्षकासह अन्य एकाला स्थानिक गुन्हे शाखेच्या पथकाने शनिवारी तेलंगणातून गडचिरोलीमार्गे चंद्रपूर येथे गांजा तस्करी करताना चिचपल्ली गावाजवळ शनिवारी अटक केली.

यावेळी १०३ किलो ८३९ ग्रॅम गांजासह सुमारे ४१ लाख १५ हजार १७० रुपयांचा मुद्देमाल जप्त करण्यात आला. शिक्षक श्रीनिवास नरसय्या मचेडी (वय ५०), शंकर बलय्या घंटा (२९, दोघेही रा. तेलंगणा) असे अटकेतील आरोपींची नावे आहेत.
परराज्यातून गडचिरोली मार्गावरून चंद्रपूरकडे दोन चारचाकी वाहनांतून गांजा तस्करी होत असल्याची माहिती मिळाल्यानंतर स्थानिक गुन्हे शाखेने वेगवेगळी पथके तयार करून मूल-चंद्रपूर रोडवर चिचपल्ली गावजवळील ढाब्याजवळ पाळत ठेवली.

तपासणीदरम्यान, वाहनांत ५१ पाकिटांमध्ये १०३ किलो ८३९ ग्रॅम वजनाचा ३१ लाख १५ हजार १७० रुपये किमतीचा गांजा आढळला. दोन्ही वाहनांसह सर्व ४१ लाख १५ हजार १७० रुपयांचा मुद्देमाल जप्त केला.