चारचाकी वाहनाची दुभाजक ओलांडून वाहनाला धडक

भद्रावती : नागपूर-चंद्रपूर मुख्य मार्गावरील एनटीपीसी रेल्वे क्रॉसिंगजवळ समोरून येणाऱ्या एका चारचाकी वाहनाला दुभाजक ओलांडून दुसऱ्या चारचाकी वाहनाने धडक दिल्याने, या वाहनातील दोघे जण गंभीर जखमी झाल्याची घटना रविवारी दुपारी २ वाजता घडली.

चंद्रकांत रामकृष्ण पोईनकर (४८) व त्यांची पत्नी कुमोद चंद्रकांत पोईनकर (४४) रा.संताजीनगर भद्रावती हे दोघे एमएच ३४ एए ९७८५ या चारचाकी वाहनाने चंद्रपूरकडे जात होते. दरम्यान, एमएच ४७ सी ४८४२ हे वाहन भरधाव वेगाने आले व चालकाचे नियंत्रण सुटल्याने दुभाजक ओलांडून समोरून येणाऱ्या वाहनाला धडक दिली. त्या वाहनातील चंद्रकांत रामकृष्ण पोईनकर व त्यांची पत्नी कुमोद चंद्रकांत पोईनकर हे गंभीर जखमी झाले. त्यांना जिल्हा रुग्णालयात उपचारासाठी दाखल करण्यात आले आहे. धडक देणारा वाहन चालक घटनास्थळावरून पसार झाला. भद्रावती पोलिसांनी त्याच्यावर गुन्हा दाखल केला असून, त्याचा शोध सुरू आहे.