बिबट्याने केली १२ बकऱ्यांची शिकार

तळोधी (नाईक) येथील घटना

फोटो

चिमूर (चंद्रपूर) : किटाळी रोडवर तळोधी गावाला लागून असलेल्या गोठ्यात १२ बकऱ्या बांधून ठेवल्या होत्या. या बाराही बकऱ्यांवर बिबट्याने हल्ला करून त्यांना ठार केले. मालक प्रवीण जांभुळे गोठ्याकडे बकऱ्या सुरक्षित आहेत की नाहीत हे पाहण्यासाठी गेले असता त्यांना सर्व बकऱ्या मृतावस्थेत आढळल्या. ही घटना बुधवारी मध्यरात्री १२ वाजताच्या सुमारास घडली.

खडसंगी बफर झोनअंतर्गत येत असलेल्या तळोधी (ना) येथील प्रवीण जांभुळे यांच्या मालकीच्या बकऱ्या होत्या. गावाला लागून असलेल्या गोठ्यात ते बकऱ्या ठेवायचे. दरम्यान, बुधवारी रात्री बिबट्याने गोठ्यात शिरून सर्व बकऱ्यांना ठार केले. गुरुवारी वन विभागाचे क्षेत्र सहायक गुरनुले, वनरक्षक बलकी यांनी घटनास्थळाचा पंचनामा केला. नुकसान भरपाई देण्याची मागणी जांभुळे यांनी वन विभागाला केली आहे. तळोधी गावात वन्यप्राण्यांचा वावर होत असल्याने नागरिक भयभीत झाले आहे. गावकऱ्यांकडून वन्यप्राण्याचा बंदोबस्त करण्याची मागणी होत आहे.