चंदनखेडा येथे कर्जधोरण व बचतगट मेळावा

चंद्रपूर : जिल्हा मध्यवर्ती बँक चंदनखेडा येथे महिला बचत गट व कर्जधोरण मार्गदर्शन मेळावा नुकताच पार पडला. यावेळी शेतकरी व सभासदांना बँकेच्या विविध योजनांची माहिती देण्यात आली.

मेळाव्यामध्ये शेतकरी, सभासद, तसेच बचत गटातील सभासदांना कर्ज भरण्याबाबत आवाहन करण्यात आले, तसेच बँकेचे नवनिर्वाचित अध्यक्ष संतोष सिंह रावत यांनी केलेल्या नवीन सुधारित कर्ज धोरणाची माहिती शाखा व्यवस्थापक मुन्ना शेख यांनी दिली. यावेळी जिल्ह्यातील शेतकरी-शेतमजूर यांच्या कुटुंबातील सदस्यांचा अपघाती मृत्यू, विजेच्या धक्क्याने मृत्यू, वन्यप्राण्यांमुळे गुरे-ढोरे मृत्यू पावल्यास, शेती कोठा, कळधान जळाल्यास बँकेचे अध्यक्ष संतोषसिंह रावत तथा सर्व संचालकांनी आर्थिक मदत देण्याचे आवाहन केले. त्याकरिता शेतकरी बांधवानी एफआयर, पटवारी पंचनामा करून संबंधित शाखेला अर्ज सादर करायचे निवेदन केले आहे. मेळाव्याला व्यावसायिक, कार्यक्षेत्रातील संस्थांचे अध्यक्ष, सचिव, कर्जदार, सभासद, शेतकरी, तसेच बचत गटातील महिला उपस्थित होत्या.