मित्राच्या वादात मध्यस्थीला गेला अन् जीव गमावून बसला

बल्लारपुरातील घटना : पाच जणांना अटक; एक गंभीर जखमी

बल्लारपूर (चंद्रपूर) : पैशाचा वाद झाल्यानंतर ते सोडविण्यासाठी मित्रासोबत मध्यस्थी करताना एका युवकाचा मारहाणीत बळी गेल्याची दुर्दैवी घटना ही घटना सोमवारी (दि. ६) रात्री १०:३० वाजता टेकडी परिसरातील विद्यानगर वॉर्डात घडली. ललित तोडसाम असे मृताचे नाव आहे. पोलिसांनी याप्रकरणी पाच जणांना अटक केली. एका जखमीवर चंद्रपूर शासकीय वैद्यकीय महाविद्यालयात उपचार सुरू आहेत.

टेकडी परिसरातील एका मित्राच्या बहिणीकडून एकाने पैसे उसने मागितले होते. ते परत मागण्यासाठी शीतलचा पती आरोपी रितिक याने वाद घातला. दरम्यान, हा वाद सोडविण्यासाठी ललित तोडसाम व अमोल देवगडे हे दोघे गेले होते. तू आमच्या मधे कशाला पडतो, असा प्रश्न उपस्थित करून रितिक आणि साथीदारांनी ललित तोडसाम व अमोल देवगडे यांना लाकडी दांड्याने बेदम मारहाण केली. यात ललित हा गंभीर झाल्याने जिल्हा सामान्य रुग्णालयात भरती केले. मात्र, उपचारादरम्यान त्याचा मृत्यू झाला.

अमोल देवगडे याच्यावर उपचार सुरू आहे. मृताच्या कुटुंबाने पोलिसात तक्रार केल्याने शांतीनगर वॉर्डातील आरोपी रितिका भीमराव गवई (२२), सौराब खान हाजी अब्दुल सुभान खान (३४), आशा भीमराव गवई (४५), शीतल रितिक गवई (२०), बंडू पांडुरंग नगराळे (४७) विद्यानगर वॉर्ड यांच्याविरुद्ध भादंवि १४३, १४७, १४८,१४९, ३०२, ३०७, ३२४, ३२३, ५०४ अन्वये गुन्हा दाखल करून अटक केली. पुढील तपास पोलिस निरीक्षक उमेश पाटील यांच्या मार्गदर्शनात सहायक पोलिस निरीक्षक शैलेंद्र ठाकरे करीत आहेत.