मोहाडी नलेश्वर तलाव पर्यटकांनी फुलले

सिंदेवाही : तालुक्यातील इंग्रजकालीन तलाव मोहाडी नलेश्वर येथे आहे. या परिसरात पावसाळ्यातील पाण्याने तलाव ओव्हरफ्लो झाल्याने ग्रामीण भागातील ‘वॉटर फॉल’चे दृश्य परिसरातील पर्यटकांना भुरळ घालत आहे. रविवारी हा तलाव पर्यटकांच्या गर्दीने फुलला होता.

तालुक्यातील तसेच इतर शहरांतील पर्यटक मंडळी तलावाचे निसर्गरम्य दृश्य व तलावातील पाण्याच्या ओव्हरफ्लोची मजा घेण्याकरिता आले होते. यावेळी अनेकांनी सहकुटुंब व मित्रपरिवारासह सहभोजनाचा आनंद घेतला. या इंग्रजकालीन तलावाला पर्यटनस्थळ घोषित करण्याची मागणी केलेली आहे. तलावाकडे जाणाऱ्या रस्त्याची दुरवस्था झाली आहे. चारचाकी वाहने जाताना मोठी गैरसोय होते. याकडे संबंधित विभागाने लक्ष देण्याची मागणी होत आहे.