शशांक नामेवार सन्मानित

कोरपना : गडचांदूर येथील शरदराव पवार कला व वाणिज्य महाविद्यालय गडचांदूर येथील मुख्य लिपिक शशांक शंकर नामेवार यांना गोंडवाना विद्यापीठाचा उत्कृष्ट कर्मचारी पुरस्कार प्राप्त झाला. त्याबद्दल नुकताच विद्यापीठाच्या वतीने राज्याचे उच्च व तंत्र शिक्षणमंत्री उदय सामंत यांच्या हस्ते सन्मानित करण्यात आले.

पाच हजार रुपये राशी व सन्मानचिन्ह असे पुरस्काराचे स्वरूप होते.

याप्रसंगी गोंडवाना विद्यापीठाचे प्रभारी कुलगुरू प्रा. श्रीनिवास वरखेडी, आमदार देवराव होळी, शिक्षण संचालक डॉ. धनराज माने, तंत्र शिक्षण संचालक डॉ.अभय वाघ, प्रभारी कुलसचिव डॉ. अनिल चिताडे आदी मान्यवर उपस्थित होते.

शशांक नामेवार हे महाविद्यालयातील उपक्रमशील आणि क्रियाशील मुख्य लिपिक असून, अनेक उपक्रमात आणि कार्यक्रमांमध्ये त्यांचा सक्रिय सहभाग राहिलेला आहे. महाविद्यालयातील विविध विस्तारकार्य, रासेयो तसेच समाजोपयोगी कार्यामध्ये नामेवार यांचे महत्त्वाचे योगदान राहिले आहे. त्यांचा अनेक सामाजिक आणि शैक्षणिक संस्थांची निकटचा संबंध असून, अनेक सार्वजनिक उपक्रमांमध्ये ते सक्रिय आहेत.