धक्कादायक! तीन वर्षीय बालकाचा दारुच्या नशेत बापाने आवळला गळा

पत्नी माहेरी गेल्याचा संताप अनावर : चाकूने वार करीत स्वत:लाही संपविण्याचा प्रयत्न

मूल (चंद्रपूर) : दारू पिऊन पत्नीला मारहाण केल्याने पत्नी घरून निघून गेली. याचा संताप अनावर झाल्याने पतीने आपल्या तीन वर्षीय मुलाचा गळा आवळून खून केला. त्यानंतर स्वत:वरही चाकूने वार करीत आत्महत्या करण्याचा प्रयत्न केला. ही खळबळजनक घटना मूल तालुक्यातील राजोली येथे रविवारी पहाटे ५ वाजता दरम्यान घडली.

प्रियांशू असे मृत बालकाचे नाव असून गणेश विठ्ठल चौधरी(३१) असे आरोपी पित्याचे नाव आहे. सध्या मूल पोलिसांनी गणेशला अटक करून मूलच्या उपजिल्हा रुग्णालयात उपचारार्थ दाखल केले आहे. मूल तालुक्यातील राजोली येथे गणेश विठ्ठल चौधरी हा पत्नी काजल आणि मुलासह राजोली येथे राहात होता. हनुमान जन्मोत्सवाच्या दिवशी तो दारू पिऊन पत्नीला मारहाण करू लागला. यामुळे ती घरून निघून गेली होती.

घरी स्वतः गणेश आणि मुलगा प्रियांशू होते. दरम्यान रविवारी पहाटे ५ वाजता दरम्यान दारूच्या नशेत मुलगा प्रियांशू याचा गळा आवळून खून केला व स्वत:च्या गळ्यावर चाकूने वार करून आत्महत्या करण्याचा प्रयत्न केला. दारूच्या आहारी गेलेल्या एका पित्याने पोटच्या मुलाचा गळा दाबून खून केल्याची घटना वाऱ्यासारखी गावात पसरली. याबाबत मूल पोलिस स्टेशनला माहिती देण्यात आली. पोलिस निरीक्षक सुमित परतेकी हे आपल्या पोलिस ताफ्यासह राजोली येथे पोहोचून कारवाई सुरू केली आहे.

आरोपी गणेश विठ्ठल चौधरी हा आत्महत्या करण्याचा प्रयत्न केल्याने त्याला अटक करून मूलच्या उपजिल्हा रुग्णालयात भरती करण्यात आले आहे. आरोपी पित्याविरुद्ध कलम ३०२ अन्वये गुन्हा दाखला करण्यात आला असून पुढील तपास पोलिस उपविभागीय अधिकारी मल्लिकार्जुन इंगळे यांच्या मार्गदर्शनाखाली पोलिस निरीक्षक सुमित परतेकी व चमू करीत आहेत.

...तर उडाला असता जनक्षोभ

निर्दयी बापाने आपल्या पोटच्या मुलाचा गळा आवळून खून केल्याची वार्ता राजोलीत पसरताच नागरिकांमध्ये असंतोष पसरला. मात्र, तत्पूर्वीच पोलिसांना याबाबत माहिती मिळाल्याने ते घटनास्थळी दाखल झाले आणि जनक्षोभ उडण्यापूर्वीच आरोपीला ताब्यात घेतले. तो जखमी असल्याने पोलिसांनी त्याला लगेच मूल येथील उपजिल्हा रुग्णालयात भरती केले.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"