वही खरेदी करायला गेलेल्या मुलीचा दुकानदाराकडून विनयभंग

सास्ती टाऊनशिपच्या बाजूला रस्त्यावर राधेश्याम किराणा दुकान आहे. या दुकानात वही घेण्यासाठी आलेल्या एका बारा वर्षीय मुलीचा दुकानदाराने विनयभंग केला.

ठळक मुद्देसास्ती टाऊनशिप येथील किराणा दुकानदाराला अटक

चंद्रपूर : राजुरा तालुक्यातील रामपूर-सहकारनगर येथील येथील एका किराणा दुकानदाराने दुकानात किराणा घेण्यासाठी आलेल्या १२ वर्षीय मुलीचा विनयभंग केला. ही घटना सोमवारी सकाळी घडली. याप्रकरणी फिर्यादीच्या तक्रारीवरून राजुरा पोलिसांनी आरोपी किराणा दुकान व्यावसायिकाविरुद्ध विनयभंग आणि पोक्सो कलमान्वये गुन्हा दाखल करून अटक करण्यात आली आहे.

राधेश्याम यादव (५०) असे आरोपीचे नाव आहे. सास्ती टाऊनशिपच्या बाजूला रस्त्यावर राधेश्याम किराणा दुकान आहे. या दुकानात शेजारच्या रामपूर, सहकारनगर येथील नागरिक किराणा व अन्य आवश्यक वस्तू घेण्यास येत असतात. सोमवारी सकाळी ९ वाजता एक अल्पवयीन मुलगी वही आणण्यासाठी दुकानात आली होती.

राधेश्याम याने मुलीला वही पाहण्यासाठी दुकानाच्या आत बोलावून तिच्या तोंडावर सिगारेटचा धूर सोडून तिला कवटाळले. यामुळे मुलगी घाबरून रडायला लागली. तेव्हा त्याने तिला चॉकलेट देऊन सोडले. या मुलीने घरी रडत येऊन आपल्या आईला घटनेची माहिती दिली.

या घटनेची तक्रार मुलीच्या आईने राजुरा पोलीस ठाण्यात केली. तक्रारीवरून आरोपीविरुद्ध विनयभंग कलम ३५४ ए (१) आणि बालकांचे लैंगिक अपराधापासून सुरक्षा संरक्षण अधिनियम २०१२ नुसार गुन्हा नोंदविण्यात आला आहे. आरोपीला पोलिसांनी अटक केली. दरम्यान, यामुळे या भागात या दुकानदाराविरुद्ध मोठा रोष निर्माण झाला. दुकानासमोर नागरिकांनी मोठी गर्दी केली होती.