सिंदेवाहीचा पशुवैद्यकीय दवाखाना दुर्लक्षित

सिंदेवाही: तालुक्याच्या ठिकाणी पशुसंवर्धन विभाग अंतर्गत असलेला पशुवैद्यकीय दवाखान्याला प्रथम श्रेणी-१ चा दर्जा असूनही दुर्लक्षित आहे. नागरिकांना नेहमीच हा दवाखाना कुलूपबंदच आढळत असल्याचे चित्र पहावयास मिळत आहे.

एका शासकीय इमारतीत १९६२ पासून गुरांचा दवाखाना आहे. प्रथम श्रेणीचा दर्जा प्राप्त आहे. दवाखाना मोडकळीस आलेला आहे. शेतकरी, नागरिक आपली जनावरे गुरांच्या दवाखान्यात आणत असतात. परंतु दवाखाना कधी बंद कधी चालू असल्याने अनेकांना जनावरांना घेऊन परत जावे लागते. पाळीव प्राणी, मुके जनावरांना रोगाची लागण झाली असता वेळेवर उपचार मिळत नाही. पशु वैद्यकीय अधिकारी उपस्थित नसल्याने कंत्राटी कर्मचाऱ्याच्या भरवशावर गुरांचा दवाखाना सुरू आहे. विशेष म्हणजे दवाखान्यात पशु चिकित्सक फिरते वाहन उपलब्ध आहेत. परंतु आश्चर्य असे की त्या गाडीला एकच कंत्राटी कर्मचारी चालक आहे व तोच प्राण्यांवर उपचारही करीत असल्याची शोकांतिका आहे. तालुक्यातील प्रथम श्रेणी दर्जा असलेल्या पशु वैद्यकीय दवाखान्यात अधिकारीच नसल्याने दुर्लक्षित आहे. त्यामुळे पशुपालकांची गैरसोय होत आहे.