क्रीडा संकुलला निधी कमी पडू देणार नाही

सुनिल केदार : बल्लारपुरातील क्रीडा संकुलाची पाहणी

चंद्रपूर : जिल्ह्यातील क्रीडा संकुलासाठी निधीची कमतरता पडू दिली जाणार नाही, असे प्रतिपादन राज्याचे क्रीडा व युवक कल्याण मंत्री सुनील केदार यांनी व्यक्त केले.

क्रीडा मंत्री सुनील केदार यांनी बल्लारपूर येथील क्रीडा संकुलाची शनिवारी पाहणी केली. यावेळी माजी अर्थमंत्री आ.सुधीर मुनगंटीवार, आ.सुभाष धोटे, क्रीडा उपसंचालक अविनाश पुंड, सार्वजनिक बांधकाम विभागाच्या अधिक्षक अभियंता सुषमा साखरवाडे, जिल्हा क्रीडा अधिकारी विनोद ठिकरे, माजी क्रीडा अधिकारी अब्दुल मुस्ताक तसेच अन्य अधिकारी उपस्थित होते.

क्रीडामंत्री सुनील केदार यांनी यावेळी बल्लारपूर क्रीडा संकुलला सोलर पॅनल तसेच संरक्षण भिंत इत्यादी कामाची दुरस्ती करण्याबाबत क्रीडा विभागाला निर्देश दिले.

बॉक्स

संकुलाचा उपयोग प्रशिक्षणासाठी व्हावा- मुनगंटीवार

बल्लारपूर येथील क्रीडा संकूल सर्व सुविधायुक्त आहे. या क्रीडा संकुलाचा उपयोग आता क्रीडा प्रशिक्षणासाठी करण्यात यावा, असे मत यावेळी माजी अर्थमंत्री आ. सुधीर मुनगंटीवार यांनी व्यक्त केले.

बॉक्स

शहीद विरांचे पुतळे विद्यार्थ्यांना प्रेरणादायी

क्रीडामंत्री केदार यांनी शनिवारी चंद्रपूर येथील सैनिक शाळेला भेट देऊन पाहणी केली. जिल्ह्यातील सैनिकी शाळा ही देशातील आजमितीला असणाऱ्या सर्व सैनिकी शाळांपैकी अतिशय उत्तम असून त्यामध्ये भारतातील अद्ययावत असे सैनिकी ग्रंथालय, शॉपिंग कॉम्पेक्स, जलतरण तलाव, वसतिगृह, फायर स्टेशन, हॉकी, फूटबॉल तसेच शहीद विरांच्या इतिहासाला दर्शविण्यासाठी पुतळेदेखील उभे राहत आहेत. शहीद विरांचे हे पुतळे विद्यार्थ्यांना प्रेरणादायी ठरेल, असे मत त्यांनी यावेळी व्यक्त केले.