मुख्याध्यापक संघाचे शिक्षक आमदारांना निवेदन

समस्या सोडविण्याचे आश्वासन : प्रत्येक महिन्याला होणार जनता दरबार

चंद्रपूर : चंद्रपूर जिल्हा मुख्याध्यापक असोसिएशनच्या वतीने नागपूर विभाग पदवीधर मतदारसंघाचे आमदार अभिजित वंजारी यांना विविध प्रलंबित शैक्षणिक समस्यांचे निवेदन देण्यात आले. यावेळी समस्यांवर चर्चा करण्यात आली. जिल्हास्तरावरील समस्या सोडविण्यासाठी प्रत्येक महिन्याला जनता दरबार घेण्याचे आश्वासन आमदार वंजारी यांनी शिष्टमंडळाला दिले.

यावेळी जिल्हा मुख्याध्यापक असोसिएशनचे अध्यक्ष नरेंद्र बोबडे, सचिव राजू साखरकर, कोषाध्यक्ष राजू पारोधे, सदस्य बंडू बीजवे, आदी उपस्थित होते.

राज्यातील विनाअनुदानित अंशत: अनुदानित, घोषित व अघोषित माध्यमिक व उच्च माध्यमिक शाळा तसेच १४६ व १६२८ उच्च माध्यमिक शाळांना विनाअट प्रचलित नियमानसार अनुदान वितरित करावे, संच मान्यता दुरुस्तीबाबत कार्यवाही करावी, संच मान्यतामध्ये शिक्षक, शिक्षकेतर कर्मचारी पदांबाबत काही शाळांमध्ये त्रुटी आहेत. शिक्षण संचालकस्तरावर दुरुस्तीबाबत जावे लागते. यामुळे वेळेचा होणारा अपव्यय व खर्चिक असल्याने संच मान्यता दुरुस्तीबाबतचे अधिकार विभागीय स्तरावर करावेत. चतुर्थ श्रेणी कर्मचाऱ्यांबाबत शासन निर्णय रद्द करावा, आदी मागण्या करण्यात आल्या. यावेळी मुख्याध्यापक असोसिएशनच्या पदाधिकाऱ्यांची उपस्थिती होती.