ताडोबा-अंधारी व्याघ्र प्रकल्पात आढळला टी-१६१ वाघाचा मृतदेह

Chandrapur News ताडोबा-अंधारी व्याघ्र प्रकल्पातील सुमारे साडेचार वर्षे वयाचा टी-१६१ हा वाघ मंगळवारी सकाळी ८ वाजता आंबेउतारा ओढ्यात मृतावस्थेत आढळला.

ठळक मुद्देफेब्रुवारीमध्ये कॅमेरा ट्रॅपमध्ये आढळली होती गळ्याभोवती जखम

चंद्रपूर : ताडोबा-अंधारी व्याघ्र प्रकल्पातील सुमारे साडेचार वर्षे वयाचा टी-१६१ हा वाघ मंगळवारी सकाळी ८ वाजता आंबेउतारा नियतक्षेत्र, रानतळोधी वर्तुळ, कारवा क्षेत्रामधील वनखंड क्रमांक २९० मधील आंबेउतारा ओढ्यात मृतावस्थेत आढळला.

एप्रिल २०१९ मध्ये टी-१९ या वाघिणीच्या १ नर व २ मादी अशा तीनही बछड्यांना रेडिओ कॉलर लावण्यात आली होती. रेडिओ कॉलरचा शेवटचा सिग्नल ऑगस्ट २०१९ मध्ये प्राप्त झाला होता. त्यानंतर २०२० आणि २०२१ मध्ये टी- १६१ हा नर वाघ व्यवस्थितपणे फिरत असल्याचे कॅमेरा ट्रॅपमुळे लक्षात आले, मात्र तांत्रिक दोषामुळे त्याची रेडिओ कॉलर काढून टाकता आली नाही. २०१९ मध्ये कॉलर काढण्यासाठी त्याला पकडण्याचा प्रयत्न केला. परंतु त्यात यश आले नाही.

त्यानंतर प्रकल्पाच्या कार्यक्षेत्रात कॅमेरा ट्रॅपमध्ये अधून-मधून या वाघाचे फोटो मिळत होते. वाघाचे आरोग्य उत्तम दिसून येत होते. मात्र, फेब्रुवारी २०२२ मध्ये मिळालेल्या छायाचित्रात या वाघाच्या गळ्याभोवती जखम दिसून आली तेव्हापासून कॉलर काढण्यासाठी त्याच्यावर लक्ष ठेवून त्याला पकडण्याचे प्रयत्न सुरू केले गेले परंतु घनदाट जंगलात तो सतत फिरत असल्यामुळे ते प्रयत्न अयशस्वी झाले. सोमवारी (दि.२९) आंबेउतारा ओढ्याजवळ हा वाघ दिसला होता. मात्र, त्याला पकडता आले नाही.

अशातच मंगळवारी शोधकार्यात असणाऱ्या पथकाला या वाघाचा मृतदेहच आढळला. शवविच्छेदनाकरिता त्याला चंद्रपूर येथील तात्पुरत्या उपचार केंद्रात नेण्यात आले. पशुवैद्यकीय अधिकारी डॉ. एकता शेडमाके, डॉ. राहुल शेंद्रे, ता़डोबा अंधारी व्याघ्र प्रकल्पाचे पशुवैद्य डॉ. कुंदन पोडचेलवार यांनी शवविच्छेदन केले. क्षेत्र संचालक यावेळी डॉ. जितेंद्र रामगावकर, कोअर विभागाचे उपसंरक्षक नंदकिशोर काळे, सहाय्यक वनसंरक्षक महेश खोरे, कारवा वनपरिक्षेत्राधिकारी कृष्णापूरकर, कोळसाचे रामटेके उपस्थित होते. याबरोबरच प्रधान मुख्य वनसंरक्षक (व.जी.) यांचे प्रतिनिधी म्हणून बंडू धोत्रे व राष्ट्रीय व्याघ्र संवर्धन प्राधिकरणाचे प्रतिनिधी म्हणून मुकेश भांदककर उपस्थित होते. शवविच्छेदनाच्या प्राथमिक निष्कर्षानुसार गळ्याभोवती झालेल्या जखमेमुळे रक्तदोष उद्भवला. वाघाचे अंतर्गत अवयव पुढील तपासणीसाठी पाठविण्यात येणार आहे. या अहवालानंतरच मृत्यूचे खरे कारण कळेल.