जिगरबाज आजोबा; वाघाच्या जबड्यातून पत्नीला खेचून आणले

पतीचा वाघावरच प्रतिहल्ला

नागभीड (चंद्रपूर) : कोणाचा विश्वास बसणार नाही; पण हे खरे आहे. त्यांनी तिला खरोखरच साक्षात मृत्यूच्या जबड्यातून ओढून आणले. त्यांच्या या हिमतीची, या थराराची परिसरात चांगलीच प्रशंसा होत आहे.

सोमेश्वर भुरले असे या जिगरबाज आजोबांचे नाव असून, ते तालुक्यातील ढोरपा येथील रहिवासी आहेत. सोमेश्वर यांची पत्नी सविता शेतात पडलेल्या धानाच्या ओंब्या वेचत होती. तर सोमेश्वर बाजूच्याच बांधात गवत कापत होते. सविता ओंब्या वेचण्याच्या कामात व्यस्त असताना दबा धरून बसलेल्या वाघाने तिच्यावर अचानक हल्ला केला.

कुऱ्हाडीच्या धाकावर वाघाशी सामना

अचानक झालेल्या हल्ल्याने ती भांबावली. मात्र, प्रसंगावधान राखून तिने वाचवा वाचवा असा आरडाओरडा केला. या आवाजाने बाजूलाच गवत कापत असलेला तिचा पती धावत आला. तेव्हा पत्नीला वाघाच्या रुपाने साक्षात काळच फरफटत ओढून नेत असल्याचे त्यांनी पाहिले; पण स्वतःचा तोल ढळू न देता ते धाडसाने वाघाच्या दिशेने धावले. स्वतःजवळ असलेली कुऱ्हाड वाघाच्या दिशेने फेकून मारण्याचे नाटक करीत दबक्या पावलांनी वाघाजवळ गेले.

वाघ जागचा हलेना अन् पतीही माघारी वळेना!

सोमेश्वर हातात कुन्हाड घेऊन वाघाच्या दिशेने धावून गेले. या पवित्र्याने सविताला जबड्यात घेतलेला वाघही गांगरून गेला; पण सविताला जबड्यात घेतलेला वाघ काही जागचा हलत नव्हता आणि सविताचे पती सोमेश्वरही माघारी वळायला तयार नव्हते.

हळूहळू सोमेश्वर वाघाजवळ पोहोचले आणि वाघावर कुऱ्हाड उगारून त्यांनी सवितास वाघाच्या जबड्यातून बाहेर काढून वाघाकडे पाहत माघारी पावलाने काही अंतर ओढत नेले. यानंतर वाघ काही अंतरावर दूर गेला. नंतर क्षणाचाही विलंब न लावता त्यांनी आजूबाजूच्या शेतकऱ्यांची मदत घेत पत्नी सविताला दवाखान्यात नेले. सवितावर आता ब्रह्मपुरी येथे अतिदक्षता विभागात उपचार सुरु आहेत.

यापूर्वीही परिसरात वाघाचे हल्ले

दरम्यान, ढोरपा मोर्शी परिसरातीलच टेकरी, पान्होळी, लाखापूर या गावात महिनाभरात वाघांनी शेतकरी व गुराख्यांवर हल्ला करून ठार केल्याच्या घटना घडल्या आहेत. यामुळे शेतकरी वर्गात चांगलीच दहशत निर्माण झाली आहे. शेतीची कामे करावी कशी, हा प्रश्न या शेतकऱ्यांसमोर निर्माण झाला आहे. वनविभागाने या वाघांचा बदोबस्त करावा, अशी गावकरी व शेतकऱ्यांची मागणी आहे.