पाच दिवस होऊनही मृत तरुणीची ओळख पटली नाही; मृतदेह अंत्यसंस्काराच्या प्रतीक्षेत

हे हत्या प्रकरण आता पोलिसांसाठी मोठे आव्हान म्हणून उभे ठाकले आहे. हा नरबळीचा प्रकार आहे का, असा प्रश्नही आता उपस्थित होऊ लागला आहे.

ठळक मुद्देसीसीटीव्ही फुटेज, मोबाईल लोकेशन हाच तपासाचा एकमेव पर्याय

भद्रावती (चंद्रपूर) : निर्वस्त्र तरुणीचे धडापासून शीर वेगळे करून तिची हत्या करण्यात आली. या हत्या प्रकरणाला पाच दिवस लोटूनही शीर गवसले नाही. आरोपी गवसले नाहीत हे तर सोडाच; पण मृत तरुणीची ओळखही पोलीस विभाग सांगू शकला नाही. त्यामुळे हे हत्या प्रकरण आता पोलिसांसाठी मोठे आव्हान म्हणून उभे ठाकले आहे.

दरम्यान, या तरुणीचे धडच घटनास्थळावर आढळल्याने तपासाला गती देणारा ठोस पुरावा गवसला नसल्याने आता पोलीस घटनेच्या दिवशी मोबाईल लोकेशन तसेच शहरातील विविध भागांचे मोबाईल लोकेशन यांवर तपास चक्रे फिरवीत असल्याचे ठाणेदार गोपाल भारती यांनी सांगितले.

पोलिसांनी घेतल्या विविध संघटनांच्या बैठका

तरुणीचे हत्या प्रकरण चिघळत असल्याने त्या किंवा इतर दिवशी अनोळखी व्यक्ती या परिसरात आढळली का, तसेच बाहेरील कोणी व्यक्ती आपल्या शेजारी राहत आहे का, एखादी तरुणी बेपत्ता आहे का, अशा विविध शोधमोहिमांसाठी भद्रावती पोलीस स्टेशन येथे पोलीस पाटील संघटना, अंगणवाडी सेविका, शहरातील विविध बँक, हॉटेल व्यावसायिक तसेच शहरातील इतर व्यावसायिकांच्या संयुक्त बैठका घेऊन तपासाला आधार देण्याचे काम पोलिसांमार्फत सुरू आहे.

अत्याचार झाला नसल्याचा प्राथमिक अंदाज

पुरावे नष्ट करण्यासाठी शिर कापून धड घटनास्थळी फेकले. त्यामुळे या तरुणीवर अत्याचार झाल्याचे स्पष्ट दिसून येत होते; परंतु पीएम अहवालाबाबत ठाणेदार गोपाल भारती यांच्याशी संपर्क साधला असता आतापर्यंत पीएम अहवाल माझ्यापर्यंत पोहोचला नाही. मात्र त्या तरुणीवर अत्याचार झाला नाही. हा वैद्यकीय प्राथमिक अंदाज आहे, असे त्यांनी सांगितले. अत्याचार करून हत्या करण्यात आली नाही तर हा नरबळीचा प्रकार आहे का, असा प्रश्न आता उपस्थित होऊ लागला आहे.