जिंतूरच्या सहायक अभियंत्यासह ४ कर्मचारी निलंबित

औरंगाबाद : वीजबिलाच्या तक्रारीची दखल न घेणे, वीजबिल दुरुस्त न करणे, अनधिकृतपणे आकडे टाकून विजेचा वापर चालू असणे, गैरवर्तन, कामात अनियमितता व निष्काळजीपण इत्यादी गंभीर प्रकार महावितरणच्या प्रादेशिक कार्यालयाच्या तपासणीत आढळून आल्याने, महावितरण जिंतूर ग्रामीण शाखा (जि. परभणी) येथील एक सहायक अभियंता, प्रधान तंत्रज्ञ, वरिष्ठ तंत्रज्ञ व विद्युत सहायक यांना निलंबित केले आहे, तसेच परभणी येथील अधिक्षक अभियंता यांनी कर्मचाऱ्यांवर अधिक नियंत्रण ठेवण्याच्या सूचना प्रादेशिक कार्यालयाकडून देण्यात आल्या आहेत.

महावितरण प्रादेशिक कार्यालय औरंगाबाद येथील पाच पथकांनी १० मार्चला परभणी जिल्ह्यात थकबाकीसाठी वीजपुरवठा खंडित केलेल्या ग्राहकांची फेरतपासणी केली. जिंतूर येथील शाखा कार्यालय अंतर्गत येणाऱ्या चारठाणा भागात सॉमिल व पिठाच्या गिरणी येथे अनधिकृतपणे विजेचा वापर सुरू होता. या प्रकरणी सहायक अभियंता विनायक उत्तमराव दिग्रसकर यांना अधिक्षक अभियंता यांनी निलंबित केले आहे. अशा प्रकारे अनधिकृत वीज वापरावर प्रतिबंध करण्यासाठी संबंधित ग्राहकावर गुन्हे दाखल करावेत, अशा सूचना देण्यात आल्या आहेत.

चारठाणा, पाचलेगाव येथे अनधिकृतपणे मोठ्या प्रमाणात आकडे आढळून आल्याने कामात अनियमितता व गैरवर्तन, वीजबिल वसुलीत दुर्लक्ष करून कंपनीच्या महसुलाचे नुकसान करणे इत्यादी दोषारोप प्रकरणी प्रधान तंत्रज्ञ आत्माराम दत्तराव ननवरे, वरिष्ठ तंत्रज्ञ अब्दुल रहेमान अब्दुल हमीद, विद्युत सहायक खुशाल ज्ञानदेव कऱ्हाळे यांना निलंबित करण्यात आले आहे. या तपासणी कामात अनियमितता आढळून आल्याने सहायक अभियंत्यासह चार कर्मचाऱ्यांना निलंबित करण्यात आले आहे.

परभणी जिल्ह्यातील गंगाखेड, जिंतूर व बामणी येथे प्रशाससकीय कामात अनियमितेचा ठपका ठेवून गंगाखेड ग्रामीण शाखा तंत्रज्ञ साहेबराव विनायक पवार व विनोद भारत गुरव, जिंतूर उपविभागातील वरिष्ठ तंत्रज्ञ बजरंग सखाराम साबळे, सुरेश पांडुरंग तारू, सुरेश साहेबराव खंदारे, तंत्रज्ञ नरेश लालपट बनपुरे यांची परभणी मंडळाबाहेर बदली करण्यात आली आहे.