१६ महिन्यांत ६ लाख नागरिकांना कोरोनाची बाधा

राम शिनगारे

औरंगाबाद : मराठवाड्यात कोविड-१९चा पहिला रुग्ण औरंगाबाद शहरात १६ मार्च २०२० रोजी आढळला होता. यानंतर मागील १६ महिन्यांत तब्बल ६ लाख ५ हजार ३४३ जणांना कोरोनाची बाधा झाली असल्याची माहिती समोर आली आहे. या कालावधीत १४ हजार ७३१ जण आपल्या प्राणाला मुकले आहेत. यात सर्वाधिक मृत्यू औरंगाबाद जिल्ह्यात ३ हजार ४४२ झाले असून, त्यानंतर बीड जिल्ह्यात २ हजार ५४२ मृत्यू झाले आहेत. कोरोनातून बरे झालेल्या रुग्णांची संख्याही ५ लाख ८७ हजार ३०५ एवढी आहे.

चीनमधून जगभरात कोविड-१९ विषाणूचा फैलाव होण्यास मार्च २०२० च्या पहिल्या आठवड्यात सुरुवात झाली होती. त्यामुळे मार्चच्या मध्यात महाराष्ट्रात दक्षता घेण्यासाठी राज्य शासनाने दहावी, बारावीच्या परीक्षा पुढे ढकलल्या होत्या. याच काळात १६ मार्चला रशियाहून आलेल्या एका महिला प्राध्यापिकेचा घेतलेला स्वॅब पॉझिटिव्ह आला. तेव्हा या स्वॅबची तपासणी पुण्यातील एनआव्ही केली होती. या पहिल्या रुग्णामुळे मराठवाड्यात प्रचंड दहशत पसरली. यानंतर रुग्णसंख्या मोठ्या प्रमाणात वाढत गेली. सुरुवातील औरंगाबाद शहरात ही संख्या अधिक होती. त्यानंतर मराठवाड्यातील उर्वरित जिल्ह्यांमध्येही याचा फैलाव झाला. पहिली लाट ओसरल्यानंतर दुसऱ्या लाटेने मराठवाड्यात विळखा घातला होता. यात मोठ्या प्रमाणात जीवित हानी झाल्याचे आकडेवारीतून स्पष्ट झाले आहे. विभागीय आयुक्तालयाच्या अहवालानुसार मार्च २०२० पासून ६ जून २०२१ पर्यंत मराठवाड्यात ६ लाख ५ हजार ३४३ जण कोरोनाबाधित झाले आहेत. यातील १४ हजार ७३१ जणांचा मृत्यू झाला. कोरोनामुक्त झालेल्यांची संख्या ५ लाख ८७ हजार ३०५ एवढी आहे. आरटीपीसीआर आणि अँटिजन टेस्टचा पॉझिटिव्हि रेट १२.९२ टक्के असून, कोरोनामुक्तचा रिकव्हरी रेट ९७.०२ टक्के एवढा असल्याचेही आकडेवारी स्पष्ट झाले. सध्या मराठवाड्यात ३ हजार ३०७ कोविड रुग्ण उपचार घेत आहेत.

चौकट

४६ लाख नागरिकांच्या कोरोना टेस्ट

मराठवाड्यातील आठ जिल्ह्यांमधील एकूण लोकसंख्येपैकी तब्बल ४६ लाख ८६ हजार १२० नागरिकांच्या आरटीपीसीआर आणि अँटिजन टेस्ट करण्यात आल्या आहेत. यात २० लाख ८१ हजार ९२० आरटीपीसीआर टेस्ट असून, २६ लाख ४ हजार २०० अँटिजन टेस्ट करण्यात आल्या आहेत. दोन्हींचा मिळून १२.९२ टक्के पॉझिटिव्हिटी रेट असल्याचेही स्पष्ट झाले.

बॉक्स

मराठवाड्यातील ६ जून २०२१ पर्यंतची आकडेवारी जिल्हा रुग्ण मृत्यू

औरंगाबाद १,४६,४३७ ३४४२

जालना ६१,२५९ ११६८

परभणी ५०,९६३ १२८३

हिंगोली १५,९५१ ३८४

नांदेड ८८,७५० २१५७

बीड ९२,६२३ २५४२

लातूर ९०,६४७ २४०४

उस्मानाबाद ५८,७१३ १३५१