विभागात ८६, ९०९ महिला पदवीधर मतदार

औरंगाबाद: मराठवाडा पदवीधर मतदारसंघात ३ लाख ७३ हजार १६६ पदवीधर मतदार असून, त्यात पुरूष पदवीधर मतदार २ लाख ८६ हजार २४९ तर महिला पदवीधर ८६ हजार ९०९ आहे. एकूण मतदारांच्या तुलनेत सुमारे २५ टक्के महिला मतदारांचे प्रमाण आहे.

सर्वाधिक १ लाख ६३ हजार ७९ पदवीधर मतदार संख्या औरंगाबाद जिल्ह्याची आहे. जालना २९ हजार ७६५, परभणी ३२ हजार ७१५, हिंगोलीत १६ हजार ७९४, नांदेड ४९ हजार २८५, बीड ६३ हजार ४३६, लातूर ४१ हजार १९०, उस्मानाबाद ३३ हजार ६३२ इतकी आहे. औरंगाबााद विभागात एकूण ८१३ मतदान केंद्र आहेत. औरंगाबाद २०६, जालना ७४, परभणी ७८, हिंगोली ३९, नांदेड १२३, लातूर ८८, उस्मानाबाद ७४, बीड १३१ मतदान केंद्र आहेत. विभागात एकूण ९३७ सूक्ष्म निरीक्षकांची नेमणूक करण्यात आली आहे. अधिकारी-कर्मचारी व्यवस्थापन, विविध पथके, कक्षाचे कामकाज तसेच मतमोजणी प्रक्रियेच्या अनुषंगाने आठही जिल्ह्यात झालेल्या पूर्वतयारीबाबत व कामकाजाबाबत विभागीय आयुक्त सुनील केंद्रेकर यांनी निवडणूक आयोग सीईओ बलदेव सिंह यांना माहिती दिली.

मतदार जनजागृतीचा दावा

विभागीय आयुक्त तथा निवडणूक निर्णय अधिकारी केंद्रेकर म्हणाले, आठही जिल्ह्यांत पदवीधर मतदारसंघ निवडणूक प्रक्रियेतील अधिकारी व कर्मचाऱ्यांना प्रशिक्षण देण्यात आले आहे. अधिकाधिक मतदारांनी मतदान करण्याबाबत विविध माध्यमांव्दारे जनजागृती केली जात आहे. पोलीस आयुक्त निखिल गुप्ता, विशेष पोलीस महानिरीक्षक के.एम. प्रसन्ना यांच्यासह सर्व पोलीस अधिकाऱ्यांनी जिल्हानिहाय करण्यात आलेल्या कायदा व सुव्यवस्था नियोजनाबाबत सविस्तर माहिती सिंह यांना दिली.