वैजापुरात ऑनर किलींगचे प्रकरण? अपहरणानंतर दहावीच्या मुलाचा मृतदेह सापडल्याने खळबळ

याप्रकरणी पोलिसांनी एका मुलीच्या वडील आणि काकास ताब्यात घेऊन चौकशी सुरु केली आहे. 

वैजापूर: काही दिवसांपूर्वी अपहरण झालेल्या एका १६ वर्षीय मुलाचा कुजलेल्या अवस्थेतील मृतदेह मंगळवारी तालुक्यातील भिवगाव शिवारात आढळून आल्याने खळबळ उडाली आहे. सचिन प्रभाकर काळे असे मृताचे नाव आहे. तो तालुक्यातील विनायक नगर येथील शाळेत दहावीच्या वर्गात शिकत होता. याप्रकरणी पोलिसांनी एका मुलीच्या वडील आणि काकास ताब्यात घेऊन चौकशी सुरु केली आहे. 

या घटनेची अधिक माहिती अशी की, मयत सचिन काळे हा विनायक नगर येथील शाळेत दहावीच्या वर्गात शिकत होता. काही दिवसांपुर्वी अपहरण झाल्याने वैजापूर पोलिस ठाण्यात अज्ञात व्यक्तींविरुद्ध अपहरणाचा गुन्हा दाखल करण्यात आला होता. मात्र, मंगळवारी भिवगाव शिवारात गट क्रमांक २३१ मध्ये भास्कर माधव गायके यांच्या शेतात कुजलेल्या अवस्थेतील मुलाचा मृतदेह आढळून आला.‌ तो मृतदेह अपहरण झालेल्या सचिन काळेचा असल्याची खात्री पटली.‌ 

पोलिस उपअधिक्षक महक स्वामी यांच्यासह पोलिस उपनिरीक्षक मनोज पाटील, मोईस बेग, राम कवडे आदींनी घटनास्थळी भेट देऊन पंचनामा केला. पोलिसांनी या प्रकरणात एका मुलीचे वडील व काका या दोघांना ताब्यात घेतले आहे. दरम्यान, अपहरण झालेल्या मुलाचा खून झाल्याचे उघडकीस आल्याने खळबळ उडाली आहे. खुनाचे कारण आणि आरोपी याचा तपास करण्याचे आव्हान पोलिसांसमोर आहे.