गतिमंद आईचा शोध घेण्याचा बहाणा, अल्पवयीन मुलीवर नातेवाईकाचा अत्याचार

आईला शोधण्याचा बहाणा करत अत्याचार, नराधमास पोलिसांनी केले जेरबंद

- मेहमूद शेख
वाळूज महानगर : गतिमंद आईच्या शोधासाठी घराबाहेर पडलेल्या वाळूज परिसरातील एका १० वर्षीय अल्पवयीन मुलीवर नात्यातीलच एकाने अत्याचार केल्याची घटना सोमवारी रात्री उघडकीस आली आहे. अत्याचार करणाऱ्या नराधमास पोलिसांनी जेरबंद केले आहे.

पिडीत अल्पवयीन निशा (१०, नाव बदलेल आहे) हिच्या वडीलांचे निधन झाले असून तिला दोन बहिणी व एक लहान भाऊ आहे. आई रेखा (नाव बदलेल आहे) गतिमंद असल्याने निशा आई आणि इतर भावंडांसह आजोबांच्या घरी राहते. दरम्यान, काही दिवसांपूर्वी माहेरी आलेल्या मावशीस निशा ही अबोल रहात असल्याचे आढळून आले. तिने विश्वासात घेऊन विचारपूस केली. त्यावेळी निशाने १ सप्टेंबरला आई घरातून गायब झाली होती. तिचा शोध घेत असताना नातेवाईक दिलीप वाघिल्या पवार (४५, रा.वाळूज परिसर) याने अत्याचार केल्याची धक्कादायक घटना सांगितली.

हे ऐकून हादरलेल्या मावशीने याची माहिती वडिलांना दिली. त्यानंतर आजोबांनी सोमवारी वाळूज पोलिसांत तक्रार दाखल केली. पोलिसांनी लागलीच दिलीप वाघिल्या पवार (४५, रा.वाळूज परिसर) याच्याविरुध्द बाल लैंगिक अत्याचार कायद्यातंर्गत गुन्हा दाखल केला. तसेच रात्रीतून शोध घेत आरोपीस वाळूज परिसरातून जेरबंद केले. या प्रकरणी पुढील तपास प्रभारी पोलिस निरीक्षक सचिन इंगोले यांच्या मार्गदर्शनाखाली सहायक निरीक्षक अमोल ढोले हे करीत आहेत.

हतबल मुलीवर केला अत्याचार
१ सप्टेंबरला आईचा शोध घेत असताना रात्री ८ वाजता नातेवाईक असलेला दिलीप वाघिल्या पवार (४५, रा.वाळूज परिसर) हा भेटला. दिलीपने आईचा शोध घेण्यास मदत करतो म्हंटले. परिचित असल्याने निशा त्याच्यासोबत आईच्या शोधात पंढरपूरात गेली. येथे आई सापडली. रात्री बराच उशीर झाल्याने वाळूजजवळ एका टपरीच्या जागेत तिघेही झोपी गेले. मात्र, मध्यरात्री अचानक दिलीप झोपेतील निशासोबत अश्लिल चाळे करू लागला. विरोध केला असता दिलीपने जीवे मारण्याची धमकी देत निशावर अत्याचार केला.