लग्नात नाचताना धक्का लागल्यामुळे दोन गटात तलवारबाजी

आंबेडकरनगर येथील घटना : जीवे मारण्याचा प्रयत्न केल्याचा गुन्हा दाखल

छत्रपती संभाजीनगर : लग्नात नाचताना धक्का लागल्याच्या कारणावरून दोन गटात तलवारीने, रॉडने बेदम हाणामारी झाली. ही घटना ९ एप्रिलला रात्री नऊच्या सुमारास आंबेडकरनगर भागात घडली. या प्रकरणी परस्परविरोधात जिवे मारण्याचा प्रयत्न केल्याचे गुन्हे नोंदविण्यात आले आहेत.

पवन उर्फ सोनू प्रकाश नवगिरे ( रा. आंबेडकरनगर, गल्ली क्र २) याने दिलेल्या तक्रारीनुसार, घरासमोर बसलेला होता. तेव्हा गल्लीत त्यांचा मित्र अतुल सोनवणे याला आरोपी दिनेश मिसाळ, गणेश मिसाळ, आकाश मिसाळ आणि बाबा हे मारहाण करीत असल्याचे दिसले. पवन याने त्यांची समजूत घालत असताना चौघांनी पवन याला रॉडने डोक्यात, पाठीवर मारहाण करून गंभीरीरत्या जखमी केले. जीवे मारण्याचा प्रयत्न केला. तर गणेश मिसाळ याने दिलेल्या तक्रारीनुसार, गणेशचा भाच्याचा लग्नात नाचत असताना धक्का लागल्याच्या कारणावरून आरोपी सोनू नवगिरे, रोहित त्रिभुवन, सतीश नवगिरे, अनिल नवगिरे, आकाश नवगिरे (सर्व रा. आंबेडकरनगर) यांनी तलवारीने गणेश याच्या डोक्यात मारून जखमी केले. तर अन्य आरोपींची रॉडने, दांड्याने मारहाण करून जखमी केले. याप्रकरणी सिडको पोलीस ठाण्यात परस्पर विरोधी गुन्हे नोंदविण्यात आले आहेत.