महापालिका परिसरातील झाड अचानक कोसळले; प्रसंगावधानाने पाच महिला बचावल्या

मुख्यालयाच्या प्रवेशद्वारा शेजारील झाड अचानक कोसळले

छत्रपती संभाजीनगर: महापालिका मुख्यालयातील लिंबाचे झाड आज सकाळी ११ वाजेच्या सुमारास अचानक कोसळले. यावेळी झाडाखाली ५ महिला होत्या. यात एक महिला जखमी झाल्याची माहिती आहे. तर प्रसंगावधान राखून इतर महिला बाजूला झाल्याने बचावल्या.

आज सकाळी पालिका मुख्यालयात प्रशासकीय काम सुरु होते. कामानिमित्त नागरिकांची वर्दळ परिसरात दिसत होती. या दरम्यान, मुख्यालयाच्या प्रवेशद्वाराजवळ असलेले जुने लिंबाचे झाड अचानक कोसळले. झाडाच्या मोठ्या फांद्या मोठ्या आवाज होत परिसरात पडल्याने गोंधळ उडाला. याचवेळी तिथे चार ते पाच महिला उपस्थित होत्या. यातील एक महिला जखमी झाली, तर इतर महिला प्रसंगावधान राखून बाजूला झाल्याने थोडक्यात बचावल्या.  उद्या याच परिसरात स्वातंत्र्यदिनानिमित्त कार्यक्रम होणार आहे. यावेळी झाड कोसळले असते तर मोठी दुर्घटना झाली असती.