सावधान, मोबाईलवर व्हिडीओ दाखविण्याचे आमिष देत अल्पवयीन मुलावर भाडेकरूचा अत्याचार

आजी वाळत घातलेले कपडे आणण्यासाठी घराच्या गच्चीवर गेली होती, तेव्हा नातवाच्या चपला भाडेकरूच्या रूम बाहेर दिसल्याने आल संशय

वाळूज महानगर : वाळूज परिसरातील एका १३ वर्षीय मुलाला घरी बोलावून आधी मोबाईलवर व्हिडीओ दाखवले नंतर धाक दाखवून त्याच्यावर अतिप्रसंग करणाऱ्या भाडेकरूविरुद्ध वाळूज पोलीस ठाण्यात गुन्हा दाखल करण्यात आला आहे. या प्रकरणी आरोपी बापू सोनवणे (रा. वाळूज परिसर) यास जेरबंद करण्यात आले आहे.

लासुर स्टेशन परिसरातील पप्पू (१३, नाव बदलले आहे.) हा शाळेला उन्हाळी सुटी लागल्याने १० वर्षांच्या लहान बहिणीसोबत आठवडाभरापूर्वी आजोळी वाळूज परिसरात आला होता. दरम्यान, बुधवार (दि. १) दुपारी २ वाजेच्या सुमारास पप्पू याची आजी वाळत घातलेले कपडे आणण्यासाठी घराच्या गच्चीवर गेली होती. गच्चीवरून खाली उतरत असताना आजीला पप्पूच्या चपला भाडेकरू बापू सोनवणे याच्या रूमसमोर दिसून आल्या. यानंतर आजीने नातवाला जोरजोरात हाका मारल्या. मात्र, आतून प्रतिसाद येत नसल्याने आजीचा आवाज ऐकून दुसऱ्या भाडेकरूने दरवाजा लोटून घरात प्रवेश केला. यावेळी घरात बापू सोनवणे हा अर्धनग्न अवस्थेत, तर पांघरुणाखाली कुणीतरी झोपलेले दिसून आले. 

यानंतर आजी व दुसऱ्या भाडेकरूने पांघरूण ओढले तेव्हा त्यांना पप्पू हा भेदरलेल्या अवस्थेत दिसला. त्याला बोलता येत नसल्याने त्याला जवळ घेऊन शांत केले. यानंतर आजी व दुसऱ्या भाडेकरूने बापू सोनवणे यास जाब विचारला असता त्याने मी काहीच केले नाही, असे म्हणत सारवासारव करण्याचा प्रयत्न केला. दरम्यान, आजीने नातू पप्पू यास घरी घेऊन गेल्यानंतर काही वेळाने त्याच्याकडे चौकशी केली. 

तेव्हा पप्पूने आपण मोबाईलवर चित्रपट पाहण्यासाठी बापू सोनवणे याच्या घरी गेल्याचे सांगत चित्रपट संपल्यानंतर घरात झोपी गेल्याचे सांगितले. यानंतर काही वेळाने बापू सोनवणे याने घरात झोपलेल्या पप्पू याला मारण्याचा धाक दाखवून अश्लील कृत्य केल्याचे सांगितले. हा धक्कादायक प्रकार लक्षात येताच पप्पूच्या आजीने वाळूज पोलीस ठाणे गाठून तक्रार दिली. या तक्रारीनंतर सायंकाळी आरोपी बापू सोनवणे यास वाळूज पोलिसांनी जेरबंद करून त्यास न्यायालयात हजर केले. न्यायालयाने आरोपीला तीन दिवसांची पोलीस कोठडी सुनावली आहे.