भरधाव टॅंकरची दुचाकीला उडविले, एक ठार

वैजापूर/लोणी खुर्द : भरधाव वेगाने जाणाऱ्या टँकरने दुचाकीला धडक दिल्याने दुचाकीवरील जण जागीच ठार झाला. तर एक जण गंभीर जखमी झाला. हा अपघात शिऊर-नांदगाव रस्त्यावरील दस्कुली शिवारात बुधवारी सायंकाळी घडला. काकासाहेब तुकाराम मगर (४५) असे अपघातात ठार झालेल्या व्यक्तीचे नाव असून पोपट हरी कर्डीले (५०) हे यात गंभीर झाले आहेत. मयत व जखमी दोघेही तालुक्यातील तलवाडा येथील रहिवासी आहेत.

काकासाहेब मगर व कर्डीले हे दुचाकीवरून (क्र. एम. एच. २० डी. एम १२६३) शिऊर बंगला येथून नांदगाव रस्त्याने तलवाडा गावाकडे जात होते. त्यावेळी मनमाडकडून पैठणकडे जाणाऱ्या टँकरने (क्र. एम.एच २० ईएल २२९९) दस्कुली शिवारात त्यांच्या दुचाकीला जोराची धडक दिली. यात काकासाहेब मगर यांचा जागीच मृत्यू झाला. पोपट कर्डीले हे गंभीर जखमी झाले. टँकरचालक घटनास्थळावरून फरार झाला आहे. घटनेची माहिती मिळताच सहायक पोलीस निरीक्षक गोरख शेळके, फौजदार नागटिळक, कर्मचारी आर. आर. जाधव, अविनाश कोमटे यांनी घटनास्थळी धाव घेतली. जखमी कर्डीले यांना उपचारासाठी औरंगाबाद येथील घाटी रुग्णालयात हलविण्यात आले आहे. तर काकासाहेब मगर यांचे शवविच्छेदन करून मृतदेह नातेवाईकांकडे देण्यात आला.

-----

अपघातग्रस्त दुचाकी,

090621\img-20210609-wa0216.jpg

टँकरच्या धडकेत एक ठार