भरधाव ट्रकने दुचाकीस्वारांना उडवले; एकाचा जागीच मृत्यू, दोघे गंभीर जखमी

दोघांपैकी एकाची प्रकृती गंभीर असून त्याची मृत्यूशी झुंज सुरू आहे

छत्रपती संभाजीनगर: सिलिंडरची वाहतूक करणाऱ्या भरधाव ट्रकचालकाने ट्रिपलसीट दुचाकीस्वारांना चिरडल्याची घटना शनिवारी दुपारी केम्ब्रिज चौक ते चिकलठाणा रस्त्यावरील इस्लामिक हॉटेलजवळ घडली. या भीषण अपघातअपघातात एक तरूण ठार झाला तर दोन तरूण गंभीर जखमी झाले असून त्यांना रुग्णालयात दाखल करण्यात आले.

अक्षय सतीश बडदे(१९) असे मृताचे नाव आहे. तर या घटनेत सद्दाम जैनी शेख (२०)आणि भगवान गोरे(२० सर्व रा. शेवगाव, जि. अहमदनगर)हे जखमी झाले आहेत.पोलिसांनी ट्रकचालकास ताब्यात घेतले आहे.
या घटनेविषयी प्राप्त माहिती अशी की, शेवगाव येथील रहिवासी असलेली ही तिन्ही मित्र शनिवारी  दुपारी त्यांच्या शेवगाव येथून मोटारसायकलने (क्रमांक एमएच १६डीबी ५६९८) छत्रपती संभाजीनगरला येत होते. केम्ब्रिज चाैक ते चिकलठाणा रस्त्यावर ते असताना त्यांच्या गॅस सिलिंडरची वाहतूक करणाऱ्या भरधाव ट्रकने त्यांना उडवले. या भीषण घटनेत तिघेही ट्रकखाली आले. यात अक्षय आणि भगवान ट्रकच्या  पुढील चाकाखाली आले. यात अक्षयच्या पोटावर चाक गेल्याने तो ऑन दी स्पॉट ठार झाला. तर भगवानचा पाय  चाकाखाली आल्याने तो गंभीर जखमी झाला. तर सद्दाम हा रस्त्यावर पडल्याने त्याच्या डोक्याला मार लागून जखमी झाला.

अपघातास्थळाजवळील इस्लामिक हॉटेलमध्ये बसलेले लोक मदतीला धावले. रूग्णवाहिका बोलावून त्यांना घाटी रुग्णालयात रवाना केला. या घटनेची माहिती मिळताच एमआयडीसी सिडको पोलीस ठाण्याचे निरीक्षक गौतम पातारे, सहायक पोलीस निरीक्षक शिवाजी चौरे आणि कर्मचाऱ्यांनी घटनास्थळी धाव घेतली. यानंतर घटनास्थळाचा पंचनामा केला. ट्रक आणि मृताची मोटारसायकल ताब्यात घेऊन पोलीस ठाण्यात नेली.