काळ्या बाजारात जाणारा गहू जप्त

वसमत : वसमत पोलिसांनी शनिवारी रेशनचा गहू काळ्या बाजारात घेऊन येणाऱ्या वाहनास ताब्यात घेतले यात दहा क्विंटल गहू आहे.

लोकमत न्यूज नेटवर्क
वसमत : वसमत पोलिसांनी शनिवारी रेशनचा गहू काळ्या बाजारात घेऊन येणाऱ्या वाहनास ताब्यात घेतले यात दहा क्विंटल गहू आहे. पोलीस या काळ्या बाजारातील खरेदीदारांचा शोध घेत आहेत.
वसमत तालुक्यातील खांडेगाव येथील रेशन दुकानाचा गहू घेऊन मिनी टेम्पो वसमतमध्ये काळ्या बाजारात विक्री करण्यासाठी येत असल्याची खबर पोलिसांनी मिळाली. त्यावरून पोलीस निरीक्षक उदयसिंह चंदेल यांनी पथकासह छापा मारला. परभणी रोडवरील प्रसाद मंगल कार्यालयाजवळ टेम्पो क्र. एमएच ३८ ई २९४४ आढळला. पोलिसांनी टेम्पो ताब्यात घेऊन पोलीस ठाण्यात आणला. या टेम्पोत रेशन दुकानावरील दहा क्विंटल गहू असल्याचे निष्पन्न झाले. पोलिसांनी पुरवठा विभागाचे नायब तहसीलदार जैस्वाल यांना पाचारण केले. त्यांनी गव्हाचे नमुने घेतले. खांडेगाव येथील राशनदुकानदारांकडून हा गहू आणला असल्याचे टेम्पोचालकांनी सांगितले आता हा गहू वसमतमध्ये कोण्या व्यापाऱ्यांकडे विक्रीसाठी जात होता. याचा तपास पोलीस करत आहेत.