आडूळ परिसरात बोगस डॉक्टरांचा सुळसुळाट

अंकुश वाघ

आडूळ : परिसरात शासकीय आरोग्य सेवा सामान्य नागरिकांपर्यंत पोहोचत नसल्याने त्याचा गैरफायदा बोगस बंगाली डॉक्‍टरांकडून घेतला जात आहे. गेल्या अनेक वर्षांपासून बोगस डॉक्टरांनी पैठण तालुक्यातील आडूळ, आंतरवाली खांडी, रजापूर, घारेगाव, एकतुनी, दाभरूळ, ब्राह्मणगाव, खादगाव, पारुंडी, गेवराई बु. या गावांमध्ये बस्तान मांडले असून गरीब, अशिक्षित नागरिकांच्या जीवाशी खेळत आहे. तर यासंदर्भात आरोग्य विभागाकडून त्यांच्यावर ठोस कारवाई होत नसल्याने बोगस डॉक्टरांचे फावत चालले आहे.

वैद्यकीय शिक्षणाची नोंदणी अथवा परवाना नसतानासुद्धा बंगाली डॉक्टरांकडून सर्रासपणे रुग्णांवर उपचार केले जात आहेत. थंडी तापाचा रुग्ण असल्यास त्याला आरामही पडतो. मात्र गंभीर आजाराचा रुग्ण असल्यास हे डॉक्टर पुढील उपचारासाठी पाठवून देतात. हा व्यवसाय करताना अंगलट येण्यासारखे काही प्रकरण घडल्यास ते बाहेरच्या बाहेर मिटविले जाते. यासाठी बोगस डॉक्टरांकडून स्थानिक पातळीवर राजकीय पदाधिकाऱ्यांना हाताशी धरले जाते. गेल्या कित्येक वर्षांपासून हा प्रकार सर्रासपणे सुरू आहे. मात्र, कोणतीच कार्यवाही होत नसल्याने बोगस बंगाली डॉक्टरांचे दवाखाने खेड्यापाड्यात बिनबोभाटपणे सुरू आहेत.

जिल्ह्यात कोरोनाचा प्रादुर्भाव मोठ्या प्रमाणात वाढला आहे. कोरोनाची लक्षणे असलेले नागरिक भीतीपोटी शासकीय दवाखान्यात उपचारासाठी दाखल न होता बोगस बंगाली डॉक्टरांकडून सध्या उपचार घेत आहेत. काही डॉक्टर तर मोठी रिस्क घेऊन घरोघरी जाऊन रुग्णांवर उपचार करीत असल्याचे समोर आले. मात्र यामुळेच कोरोनाचा प्रादुर्भाव दिवसेंदिवस वाढत आहे.

समिती नावालाच

आरोग्य विभागाच्या जिल्हास्तरीय व तालुकास्तरीय समितीच्या माध्यमातून बोगस डॉक्टरांवर कारवाई केली जाते. काही ठिकाणी जिल्ह्यात कारवाई झाली. मात्र, ती कारवाई ठोसपणे होत नसल्याने पुन्हा डॉक्टरांचा सुळसुळाट सुरू झाला आहे.

आडूळ प्राथमिक आरोग्य केंद्राअंतर्गत पाच उपकेंद्रात आरोग्य विभागाचा एकही कर्मचारी मुख्यालयी राहत नाही. बंगाली बोगस डॉक्टर मद्यपान करून रुग्णांवर उपचार करीत असल्याने रुग्णाच्या जीवाशी ते खेळ घालीत आहेत.

- शेख शौकत, आडूळ, ग्रामस्थ.

हा अतिशय गंभीर प्रकार असून तपासणी पथक पाठवून आडूळ परिसरातील बोगस डॉक्टरांवर निश्चित कडक कारवाई केली जाईल.

- डॉ सुधाकर शेळके, जिल्हा आरोग्य अधिकारी

फोटो : आडूळ परिसरात बोगस बंगाली डॉक्टरांचे असे गावात ठिकठिकाणी दवाखाने थाटले आहेत. तर एका रुग्णांवर घरी उपचार करताना बंगाली डॉक्टर.