दुभाजकावर कार धडकून तरुण ठार

औरंगाबाद : भरधाव कारचे टायर फुटल्याने ती दुभाजकावर आदळून झालेल्या अपघातात तरुण ठार झाला, तर त्याचा मित्र गंभीर जखमी झाला. हा अपघात मंगळवारी मध्यरात्री सिडकोतील आंबेडकर चौकात झाला. सय्यद आवेज सय्यद अहमद (३२, रा. नारेगाव ) असे मृत तरुणाचे नाव आहे, तर ऐजाज हा जखमी झाला असून, त्याच्यावर खासगी रुग्णालयात उपचार सुरू आहेत.

आवेज आणि ऐजाज हे दोघेही कारने मंगळवारी रात्री १२.३० वाजता जळगाव रोडने जात होते. यावेळी सिडकोतील आंबेडकर चौकाजवळ कारचे टायर फुटल्याने ऐजाजचे कारवरील नियंत्रण सुटले. कार दोन ते तीन पलटी मारून दुभाजकावर आदळली. त्यामुळे आवेज आणि ऐजाज हे गंभीर जखमी झाले. त्यांना हेल्प रायडर्स ग्रुपचे शुभम गुप्ता व भीमा धर्मे यांनी नागरिकांच्या मदतीने खासगी रुग्णालयात दाखल केले. मात्र, आवेजची प्रकृती जास्त बिघडल्याने त्याला घाटी रुग्णालयात दाखल करण्यात आले होते. उपचारादरम्यान त्याचा पहाटे २.१५ वाजता त्याचा मृत्यू झाला. ऐजाज व आवेज दोघे कोठे जात होते, हे नातेवाईकांना माहिती नाही. सय्यद आवेजचे नारेगाव येथे मोबाईलचे दुकान आहे. तो विवाहित असून, त्याला नऊ महिन्यांचा मुलगा आहे.

याप्रकरणी सिडको पोलीस ठाण्यात नोंद करण्यात आली.