जलकुंभावर चढले, पुतळे जाळले अन अंगावर रॉकेल ओतून घेतले

औरंगाबाद: दिल्लीत आंदोलन करणाऱ्या शेतकऱ्यांबद्दल अपशब्द काढणारे केंद्रीय मंत्री रावसाहेब दानवे यांनी शेतकऱ्यांची माफी मागावी, अशी मागणी करीत प्रहार जनशक्ती पक्षाचे २५ ते ३० कार्यकर्ते गुरूवारी दुपारी अचानक शिवाजीनगर येथील जलकुंभावर चढले. पोलीस आणि जनतेचे लक्ष वेधून घेत त्यांनी दानवे यांचे दोन पुतळे जाळले. एका कार्यकर्त्याने अंगावर रॉकेल ओतून घेतले, परंतु अन्य कार्यकर्त्यांनी त्याला रोखले. पोलिसांनी त्यांची समजूत काढण्याचा प्रयत्न केला, मात्र त्यांची जोरदार घोषणाबाजी रात्री उशिरापर्यंत सुरूच होती.

प्रहार जनशक्ती पक्षाच्या पदाधिकाऱ्यांनी गुरुवारी दुपारी १२ वाजेपासून शिवाजीनगर जलकुंभावर आंदोलन सुरू केले. या आंदोलनाची माहिती मिळताच पुंडलिकनगर पोलीस ठाण्याचे सहाय्यक पोलीस निरीक्षक घनश्याम सोनवणे यांनी धाव घेतली. आंदोलकाशी चर्चा करण्यासाठी ते जलकुंभावरुन चढू लागले. मात्र आंदोलक आक्रमक झाल्याने त्यांना तेथून परतावे लागले. आंदोलकापैकी काही जण कपडे काढून घोषणा देत होते तर काही जण तेथे पडलेले प्लास्टीक कुलरचे खोके आणि लाकडी बॉक्स जाळून लक्ष वेधून घेत होते. आंदोलनात सुधाकर शिंदे, बाळू भोसले, अमोल ढगे, दीपक चिकटे, राम गाडेकर, मंगेश साबळे, सुदाम गायकवाड, यांच्यासह सुमारे २५ ते ३० कार्यकर्ते सहभागी झाले होते.

==================

चौकट

काय आहेत मागण्या - शेतकरीविरोधी काळे कायदे तात्काळ रद्द करा.

-दिल्ली येथील शेतकरी आंदोलनाविषयी केंद्रीय राज्यमंत्री रावसाहेब दानवे यांनी केलेल्या वक्तव्याबद्दल जाहीर माफी मागावी.

============

चौकट

पोलीस उपायुक्त, सहाय्यक आयुक्तांची शिष्टाई असफल

पोलीस उपायुक्त दीपक गिऱ्हे, सहाय्यक आयुक्त निशीकांत भुजबळ, पोलीस निरीक्षक संतोष पाटील यांनी शिवाजीनगर येथे धाव घेतली. त्यांनी आंदोलकांना खाली उतरण्याचे आवाहन केले. मात्र आंदोलकांनी त्यांचे ऐकले नाही.

=============

जलकुंभावर जेवण आणि झोपण्यासाठी कंबळ

जलकुंभावर चढून दुपारी १२ वाजता सुरू झालेले आंदोलन मागण्या मान्य न झाल्यामुळे रात्री उशिरापर्यंत सुरू होते. आंदोलकांनी जलकुंभावर पिण्याच्या पाण्याचे जार नेले. रात्री ९:३० वाजता ९ ते १० आंदोलक खाली उतरले आणि उर्वरित आंदोलकांसाठी जेवण घेऊन गेले. थंडीचा त्रास होऊ नये याकरिता आंदोलकांना कंबळ देण्यात आल्या.

========

पोलिसांसमोर पुतळे नेऊन जलकुंभावर जाळले

खाली असलेल्या आंदोलकांना पकडले तर जलकुंभावरील आंदोलक टोकाचे पाऊल उचलतील, अशी पोलिसांना भीती होती. पोलिसांसमोर आंदोलकांनी दानवे यांचे दोन पुतळे जलकुंभावर नेले. पोलिसांनी त्यांना अडविले नाही. जलकुंभावर पुतळे नेऊन जोरदार घोषणा देत जाळले.

==========

जलकुंभाखाली पोलिसांचा खडा पहारा

विनंती करुनही आंदोलक जलकुंभावरुन खाली उतरत नसल्यामुळे शेवटी पोलिसांनी जलकुंभाखाली राहुटी लावून तेथे खडा पहारा सुरू ठेवला.