CoronaVirus : धक्कादायक ! औरंगाबादमध्ये कोरोनाचा अकरावा बळी

शहरातील एका खाजगी रुग्णालयात उपचार सुरू असताना भडकलगेट येथील ६५ वर्षीय रुग्णाचा मृत्यू झाला.

औरंगाबाद : शहरात मंगळवारी कोरोनाचा ११ वा बळी गेला. शहरातील एका खाजगी रुग्णालयात उपचार सुरू असताना भडकलगेट येथील ६५ वर्षीय रुग्णाचा मृत्यू झाला.

हा रुग्ण २७ एप्रिल रोजी रुग्णालयात दाखल झाला होता. त्याचा अहवाल २८ रोजी पॉझिटिव्ह आला होता. रुग्णालयात दाखल झाल्यापासून हा रुग्ण व्हेंटिलेटरवर होता. त्याला इतरही आजार होते, असे डॉ. प्रवीण सूर्यवंशी यांनी सांगितले.

दरम्यान, औरंगाबादेत कोरोनाचा आलेख वाढतच आहे. शहरात मंगळवारी सकाळी तब्बल २४ जणांचा अहवाल पॉझिटिव्ह आला. त्यामुळे शहरातील कोरोना पॉझिटिव्ह रुग्णांची संख्या ३२१ झाली आहे.

सोमवारी १४ रुग्ण, मंगळवारी २४ 
औरंगाबादेत सोमवारपर्यंत २९७ रुग्णसंख्या होती. सोमवारी दिवसभरात १४ रुग्ण आढळून आले होते. २७ एप्रिलपासून रोज २० पेक्षा अधिक रुग्ण आढळून येत होते. सोमवार मात्र, त्याला अपवाद ठरला होता. त्यानंतर मंगळवारी सकाळीच २४ संशयितांचा अहवाल पॉझिटिव्ह आला. यात २१ रुग्ण एकट्या जयभीमनगर येथील आहेत. बुद्धनगर, अजबनगर आणि संजयनगर येथील प्रत्येकी एक रुग्ण पॉझिटिव्ह आढळून आला आहे, अशी माहिती अधिष्ठाता डॉ.कानन येळीकर यांनी दिली.