सहा म्हशींवर आले विघ्न, आता कसे करावे मुलीचे लग्न

पैठण : पाचोड रोडवरील ओढ्यात शनिवारी दुपारी पाणी पिण्यासाठी उतरलेल्या म्हशींवर महावितरणची विद्युत तार तुटून पडल्याने सहा म्हशी मरण पावल्या. या सहा म्हशी शंकर सदाशिव काटकर यांच्या मालकीच्या होत्या. पाच दिवसांनंतर त्यांच्या मुलीचे लग्न होते. या सहापैकी दोन म्हशी विकून ते मुलीच्या लग्नासाठी पैसा उभा करणार होते; परंतु या घटनेमुळे ते आर्थिक संकटात सापडले असून, आता मुलीचे लग्न कसे करावे, असा प्रश्न त्यांना पडला आहे.

पैठण शहरातील शंकर काटकर (रा. इंदिरानगर) यांच्या मालकीच्या पाच म्हशी, एक रेडा व गायीला शनिवारी नेहमीप्रमाणे पाचोड रोडवरील परिसरात चरण्यासाठी सोडले होते. यादरम्यान गाय वगळता सर्व जनावरे परिसरातील ओढ्यात पाणी पिण्यासाठी पाण्यात उतरली. दुर्दैवाने ओढ्यावरून जाणारी महावितरणची तार अचानक तुटून ओढ्याच्या पाण्यात पडली. तारेत विद्युत प्रवाह सुरू असल्याने पाण्यातील सहा म्हशी तडफडून मरण पावल्या. ओढ्याच्या किनाऱ्यावर बसलेल्या गायीलासुद्धा विद्युत धक्का बसला. घटनेची माहिती मिळताच राष्ट्रवादी काँग्रेसचे शहराध्यक्ष दिलीप सोनटक्के, नगरसेवक ईश्वर दगडे यांच्यासह नागरिकांनी घटनास्थळी धाव घेतली. विद्युतपुरवठा बंद करून ट्रॅक्टरच्या साहाय्याने म्हशींना पाण्याबाहेर काढले. घटनास्थळी पशुवैद्यकीय अधिकारी डॉ. निवास भुजंग यांनी म्हशींचे शवविच्छेदन केले.

एकाच वेळी सहा म्हशी मरण पावल्याने शंकर काटकर यांच्या परिवाराने फोडलेला हंबरडा उपस्थितांना हेलावून गेला. महावितरणने संबंधित शेतकऱ्यास नुकसानभरपाई द्यावी, अशी मागणी नागरिकांनी केली आहे.

-------- म्हशींवरच उदरनिर्वाह ----

इंदिरानगरातील शंकर काटकर यांचा उदरनिर्वाह याच म्हशींवर अवलंबून होता. म्हशींचे दूध विक्री करणे हा त्यांचा व्यवसाय असल्याने या घटनेमुळे त्यांच्यावर अचानक आभाळ कोसळले. या संकटाने काटकर परिवार हादरून गेला. यात जवळपास सहा लाखांच्या म्हशी मरण पावल्या असून, उदरनिर्वाहाचे साधनही त्यांच्या हातातून गेले आहे.

-------- सात तारखेला मुलीचे लग्न ---

शंकर काटकर यांच्या मुलीचा विवाह ७ जानेवारी रोजी होणार आहे. सहापैकी दोन म्हशी विकून विवाहाचा खर्च करण्याचे त्यांनी ठरविले होते. दुर्दैवाने सहाही म्हशी मरण पावल्याने काटकर यांच्यावर संकट कोसळले असून, विवाहाचा खर्च कसा करावा, असा प्रश्न त्यांच्यासमोर उभा ठाकला आहे. शंकर काटकर यांचा मुलगा म्हशीमागे होता. म्हशी पाण्याबाहेर काढण्यासाठी तो पाण्यात जात असताना त्याला मोबाइलवर कॉल आल्याने तो बोलत थांबला. नेमकी त्याच वेळी पाण्यात तार तुटून पडली व पुढील अनर्थ टळला.