कॉस्मो फाउंडेशनतर्फे किटचे वाटप

वाळूज महानगर : कॉस्मो फाउंडेशनच्या वतीने रांजणगाव पोळ येथील लोकनेते साहेबराव पाटील डोणगावकर माध्यमिक विद्यालयात कोरोना संरक्षण किटचे वितरण करण्यात आले.

फाउंडेशनचे जिल्हा समन्वयक हेमलता राजपूत यांच्या हस्ते स्वयंचलित सॅनिटायझर मशीन, दोन थर्मल गन, दोन ऑक्सिमीटर, सॅनिटायझर, मास्कचे वितरण करण्यात आले. कार्यक्रमाला शालेय समितीचे अध्यक्ष शिवाजी बोडखे, प्रा. संतोष मल्लनाथ, समन्वयक श्याम भोजने, उपसरपंच दत्तू कुऱ्हाडे आदींची प्रमुख उपस्थिती होती.

-------------------------

बजाजनगरात हातगाड्यावर दारूची विक्री

वाळूज महानगर : बजाजनगरातील मीनाताई मार्केट परिसरात हातगाड्यावर अवैधरित्या देशी दारूची विक्री केली जाते. हातगाडीवर छोटे व्यावसायिक खाद्यपदार्थांसोबत देशी दारूच्या बाटल्याही विक्री करतात. हातगाड्यावर मद्य प्राशन करून मद्यपी सार्वजनिक ठिकाणी गोंधळ घालत असल्यामुळे दुकानदार व नागरिक त्रस्त झाले आहेत.

-----------------------

आरोग्य केंद्रासमोरील रस्त्याची दुरवस्था

वाळूज महानगर : वाळूजच्या प्राथमिक आरोग्य केंद्रासमोरील रस्त्याची दुरवस्था झाल्यामुळे रुग्णांना आदळ-आपटीचा त्रास सहन करावा लागत आहे. रस्त्यावर ठिक-ठिकाणी खड्डे पडल्याने तसेच वाहने ये-जा करताना धूळ उडत असल्यामुळे रुग्णांना गैरसोयीचा सामना करावा लागत आहे. या रस्त्याची दुरुस्ती करण्याची मागणी रुग्ण व नागरिकाकडून केली जात आहे.

--------------------