जि.प.अध्यक्षांच्या जीपला अपघात

आष्टी : कार्यक्रम आटोपून आष्टीकडे निघालेल्या जिल्हा परिषद अध्यक्षा सविता गोल्हार यांच्या जीपला (एमएच २३ एडी ३९१८) अपघात झाला.

लोकमत न्यूज नेटवर्क
आष्टी : कार्यक्रम आटोपून आष्टीकडे निघालेल्या जिल्हा परिषद अध्यक्षा सविता गोल्हार यांच्या जीपला (एमएच २३ एडी ३९१८) अपघात झाला. यामध्ये चालक व गोल्हार दोघेही किरकोळ जखमी झाले. ही घटना आष्टी तालुक्यातील डोईठाण येथे शनिवारी सायंकाळी पाचच्या सुमारास घडली.
शिरुर तालुक्यातील गोमळवाडा येथील कीर्तनाचा कार्यक्रम आटोपून सविता गोल्हार आष्टीला येत होत्या. रस्त्यातच त्यांनी सांगवी येथे एका कार्यकर्त्याच्या घरी भेट देऊन चहापान केले. तेथून त्या आपल्या जीपमधून पुन्हा आष्टीकडे निघाल्या. डोईठाणजवळ चालक शेख अफसर याचे नियंत्रण सुटल्याने जीप रस्त्याच्या बाजूला असलेल्या झाडावर जाऊन आदळली. वेग कमी असल्याने मोठा अनर्थ टळला. यात दोघेही किरकोळ जखमी झाले. रस्त्यावरुन ये-जा करणाऱ्या वाहनधारकांनी त्यांना आष्टी रुग्णालयात दाखल केले. त्यांना घरी पाठवले असून, प्रकृती ठीक असल्याचे स्वत: गोल्हार यांनी सांगितले.
दरम्यान, आपण ठीकठाक असून, उद्यापासून नागरिकांच्या सेवेसाठी तयार राहणार असल्याचे सविता गोल्हार यांनी लोकमतशी बोलताना सांगितले.