‘आमच्या मुलीचे फोटो काढू नका’

बॉलिवूड अभिनेत्री अनुष्का शर्मा आणि विराट कोहली यांनी मुलीचे फोटो काढू नयेत, अशी विनंती फोटोग्राफरला केली आहे. अनुष्का आणि विराट कोहलीने फोटोग्राफर्सला एक नोट लिहिली आहे. या नोटमध्ये त्यांनी त्यांच्या मुलीचे फोटो फोटोग्राफर्सने काढू नयेत असे म्हटले होते. ‘आई-वडील म्हणून आम्ही तुम्हाला विनंती करतो. आमच्या मुलीचे कोणीही फोटो काढू नयेत. कृपया आम्हाला सहकार्य करा’ असे त्यांनी म्हटले आहे. पुढे नोटमध्ये विराट आणि अनुष्काने, योग्य वेळ येताच मुलीचे फोटो शेअर करू असे म्हटले आहे.

रोनित व रिचाच्या ‘कँडी’ची उत्सुकता

रोनित रॉय व रिचा चड्ढाची ‘कँडी’ ही वेब सिरीज लवकरच प्रेक्षकांच्या भेटीला येणार आहे. याबाबत बोलताना रोनित म्‍हणाला, ‘मला प्रतिभावान दिग्दर्शकांसोबत काम करण्‍याची संधी मिळाल्‍याने मी खूपच नशीबवान आहे.’ तर रिचा म्‍हणाली, ‘ही थ्रिलर/ सायकोलॉजिकल हॉरर शैली माझ्यासाठी नवीन आहे. सखोलता असलेल्‍या भूमिका साकारण्‍याकडे मी नेहमीच आकर्षून गेले आहे आणि ही अगदी परिपूर्ण संधी होती.’ सिरीजचे दिग्‍दर्शन आशिष आर. शुक्‍ला यांनी केले आहे.

प्रिया वारियरचे नवे गाणे व्हायरल

फक्त आपल्या डोळ्यांच्या इशाऱ्याने सगळ्यांच्या मनावर राज्य करणारी अभिनेत्री म्हणजे प्रिया प्रकाश वारियर आहे. ‘ओरू अदार लव्ह’मधील व्हिडीओमुळे चर्चेत आलेल्या प्रियाचे नवे गाणे प्रदर्शित झाले असून ते व्हायरल झाले आहे. हे एक तेलुगू गाणे असून मकरसंक्रांतीच्या दिवशी हे गाणे प्रदर्शित करण्यात आले आहे. या गाण्याचे नाव ‘लाडी लाडी’ आहे. प्रियाने तिच्या इन्स्टाग्राम अकाऊंटवरून म्युझिक व्हिडीओ प्रदर्शित होणार याची माहिती एका पोस्टद्वारे दिली होती. त्या पोस्टमध्ये या म्युझिक व्हिडीओचे पोस्टर प्रियाने शेअर केला आहे.