टँकरमधून गॅस गळतीनंतर सिडको उड्डाणपूल परिसरात इर्मजन्सी; घरे, दुकाने रिकामे केली

पोलिसांकडून परिसरात गॅस न पेटवण्यासाठी अनाउन्समेंट करण्यात आली आहे

छत्रपती संभाजीनगर: आज पहाटे सव्वा पाच वाजेच्या सुमारास जालना रोडवरील उड्डाणपुलास धडकल्यानंतर टँकरमधून गॅस गळती सुरू झाली आहे. सहा तासांपासून येथे आपतकालीन परिस्थिती आहे. पोलिसांनी दोन्ही बाजूंनी  वाहतूक बंद केली आहे. तसेच खबरदारीचा उपाय म्हणून प्रशासनाने ५ किलोमीटर परिसरातील वीज पुरवठा बंद केला असून नागरिकांना घरे खाली करण्यास सांगितले आहे. उड्डाणपरिसरातील कॅनॉट प्लेस, हायकोर्ट जवळील आस्थापना देखील बंद करण्यात आल्या आहेत. तसेच मोबाईल नेटवर्क ही बंद करण्याच्या सूचना देण्यात आल्याची माहिती आहे.

१७. ५ मेट्रिक टन गॅस टँकरमध्ये 
शहरातील सिडको उड्डाणपुलाजवळ एचपी कंपनीच्या गॅस टँकरला पहाटे सव्वा पाच वाजेच्या सुमारास अपघात झाला. त्यानंतर मोठ्या प्रमाणावर गॅसची गळती सुरू आहे. चिकलठाणा एमआयडीसी परिसरात हिंदुस्तान पेट्रोलियम कंपनीचा डेपो असून, या ठिकाणी टँकरने गॅसचा पुरवठा केला जातो. पहाटे सव्वा पाच वाजेच्या सुमारास साडे सतरा हजार लिटर गॅस असलेला टँकर या डेपोकडे जात असताना सिडको उड्डाणपूल सुरू झाल्यावर चालकाचा ताबा सुटल्याने टँकर उड्डाणपुलाच्या भिंतीवर चढला. 

आतापर्यंत ७० टँकरचा मारा
सदर घटनेची माहिती अग्निशमन विभागाचे अधिकारी व पोलीस अवघ्या पाच -दहा मिनिटांमध्ये घटनास्थळी पोहोचले. त्यांनी चारही बाजूने रस्ता बंद केला. टँकरमधून मोठ्या प्रमाणावर गॅस गळती होत असल्यामुळे परिसरातील लाईट बंद करण्यात आली. अनुचित प्रकार घडू नये, म्हणून या टँकरवर पाण्याचा मारा केला जात आहे. आत्तापर्यंत ७० टँकर पाण्याचा मारा करण्यात आला आहे. संपूर्ण वाहतूक थांबवण्यात आली असून, चार तासांसाठी तीन उपकेंद्रांवरील वीजही बंद करण्यात आली आहे. 

वाहतूक ठप्प 
शहरातील मुख्य जालना रोडवरील वाहतूक मुकुंदवाडी आणि सेव्हन हिल उड्डाणपूलापासून दोन्ही बाजूने बंद करण्यात आली आहे.इतर मार्गे वाहतूक वळविण्यात आल्याने गजानन मंदिर रोड, पुंडलीक नगर, मुकुंदवाडी, प्रोझोन मॉल रोड, सिडको बसस्टँडजवळ वाहतूक ठप्प झाली आहे. नागरिकांनी पर्यायी मार्ग वापरण्याचे आवाहन वाहतूक शाखेने केले आहेत.

नागरिकांना आवाहन
या परिसरात कोणीही जाऊ नये, वसंतराव नाईक, शिवछत्रपती कॉलेज, कॅनॉट प्लेस, हायकोर्ट, सिडको बसस्थानक या परिसरात घरगुती अथवा कुठलेही ज्वलनशील पदार्थ न पेटवण्याचे आवाहन पोलीस आयुक्त मनोज लोहिया यांनी केले आहे.

मनपा अधिकारी, महसूल, पोलीस अधिकारी घटनास्थळी
धोकादायक परिस्थितीची शक्यता असल्याने महापालिका, महसूल आणि पोलिस विभागातील सर्व उच्चपदस्थ अधिकारी, कर्मचारी उड्डाणपूल परिसरात दाखल झाले आहेत. गॅस गळतीचा आढावा घेऊन अधिकारी यंत्रांना सूचना करत आहेत. प्रशासनाने परिसरातील सर्व महाविद्यालय, शाळा बंद ठेवण्याच्या सूचना करण्यात आल्या आहेत. कॅनॉट प्लेस, सेंट्रल नाका, एपीआय कॉर्नर पर्यंत आस्थापना, शाळा बंद ठेवण्यात आल्या आहेत. दरम्यान, परिस्थिती सुरळीत होण्यासाठी आणखी पाच ते सहा तास लागण्याची शक्यता आहे.