पंधरा वर्षांच्या मुलीला प्रेमाच्या जाळ्यात ओढून केले अत्याचार; नराधम अटकेत

rape on minor in Aurangabad आरोपी तिला भाड्याने घेतलेल्या खोलीत घेऊन जात असे आणि तिच्यावर अत्याचार करीत असे.

ठळक मुद्देप्रेमाच्या जाळ्यात ओढून तिच्याशी जवळीक साधली. तिच्या अर्धनग्न छायाचित्राच्या आधारे ब्लॅकमेल केले

औरंगाबाद : कॉलनीतील शाळकरी १५ वर्षीय मुलीला प्रेमाच्या जाळ्यात ओढून तिच्यावर अत्याचार करणाऱ्या नराधमाला वेदांतनगर पोलिसांनी बुधवारी (२ जून) रात्री ताब्यात घेतले.

अजय राजपूत (२७, रा. पदमपुरा) असे आरोपीचे नाव आहे. प्राप्त माहितीनुसार पीडिता दहावीत शिकते, तर आरोपी अजय हा सध्या बेरोजगार आहे. यादरम्यान त्यांची ओळख झाली असता आरोपीने त्याचा मोबाइल क्रमांक पीडितेला देऊन तो तिला कॉल करायला लावत असे. यादरम्यान तिला त्याने प्रेमाच्या जाळ्यात ओढून तिच्याशी जवळीक साधली. तिचे अर्धनग्न छायाचित्र काढले. या छायाचित्राच्या आधारे तिला ब्लॅकमेल करून आरोपी तिला भाड्याने घेतलेल्या खोलीत घेऊन जात असे आणि तिच्यावर अत्याचार करीत असे. या प्रकाराला कंटाळलेल्या पीडितेने ही बाब तिच्या नातेवाइकांना सांगितली. यानंतर पीडितेच्या आईने अजयविरुद्ध वेदांतनगर पोलीस ठाण्यात तक्रार नोंदविली. पोलीस निरीक्षक रामेश्वर रोडगे आणि कर्मचारी यांनी तातडीने कारवाई करीत आरोपीला ताब्यात घेतले.