मित्राच्या वडिलाचा चाकूने भोसकून खून, टाऊन हॉल परिसरातील घटना

आरोपी जखमी, घाटीत उपचार सुरू.

छत्रपती संभाजीनगर : पैशाच्या व्यवहाराच्या वादातुन मित्राच्या वडिलांचा चाकूने भोसकून खून केल्याचा घटना शुक्रवारी रात्री आठ वाजेच्या सुमारास टाऊन हॉल परिसरात घडली आहे. रत्यावरच हा खूनाचा प्रकार घडला. खून करणारा आरोपी जखमी झाला असून, त्यास पोलिसांनी ताब्यात घेतल्याची माहिती निरीक्षक शिवाजी तावरे यांनी दिली.

कैलास रामचंद्र वाकेकर (४७, रा. जयभीमनगर, टाऊन हॉल) असे मृताचे तर अजय काशीनाथ चव्हाण (२५, रा. पेठेनगर, भावसिंगपुरा) असे आरोपीचे नाव आहे. पोलिसांनी दिलेल्या माहितीनुसार मृत कैलास यांच्या दोन्ही मुलांसोबत आरोपी अजय चव्हाण याची मैत्री आहे. काही वर्षीपूर्वी अजय चव्हाण हा सुद्धा जयभीमनगरमध्ये राहत होता. त्यातुन त्याची ओळख होती. कैलास वाकेकर हे रंग देण्यास इतर प्रकारचे काम करून उदारनिर्वाह करीत होते. तर अजय चव्हाण हा सुद्धा रोजंदारीवर काम करीत होता.

त्याचा कामावर जाण्या येण्याचा मार्ग टाऊन हॉल परिसरातुन होता. शुक्रवारी तो घराकडे जात असताना रस्त्यावरच कैलास वाकेकर यांच्यासोबत पैशाच्या व्यवहारातुन दोघात वाद सुरू झाले. हा वाद एवढा विकोपाला गेला की, अजयने त्यांना रस्त्यावर पाठीमागून चाकूने भोसकले. त्यात कैलास रस्त्यावरच कोसळले. तेव्हा घटनास्थळावर आरोपी अजय यासही बेदम मारहाण करण्यात आली. गंभीर जखमी कैलास यांना घाटी रुग्णालयात दाखल केल्यानंतर त्याठिकाणी मृत घोषीत केले. त्यानंतर जखमी आरोपीलाही उपचारासाठी घाटी रुग्णालयात दाखल केले आहे. या प्रकरणी रात्री उशिरापर्यंत गुन्हा नोंदविण्याची प्रक्रिया सुरू होती.

वरिष्ठ अधिकाऱ्यांची घटनास्थळी धाव

भर रस्त्यावर खूनाची घटना उघडकीस आल्यानंतर घटनास्थळी वरिष्ठ अधिकाऱ्यांनी धाव घेतली. तसेच बेगमपुराचे निरीक्षक शिवाजी तावरे, सहायक निरीक्षक हरेश्वर घुगे, उपनिरीक्षक विशाल बोडखे यांच्यासह इतरांनी धाव घेत पंचानामा केला.