वडगाव-बजाजनगरात गँगवॉर; सराईत गुन्हेगाराचा दगडाने ठेचून खून

वाळूज महानगर : वडगाव- बजाजनगरात पुन्हा गँगवॉर उफाळले असून, २७ वर्षीय सराईत गुन्हेगाराचा अज्ञात मारेकऱ्यांनी दगडाने ठेचून खून केल्याची खळबळजनक घटना शुक्रवारी रात्री १० वाजेच्या सुमारास बजाजनगरात घडली. या हल्ल्यात गंभीर जखमी गुन्हेगाराची ओळख पटली असून, त्याचे नाव विशाल ऊर्फ मड्ड्या किशोर फाटे (रा. वडगाव) असे असून, तो वडगावात गतवर्षी योगेश प्रधान या तरुणाच्या खूृन प्रकरणातील आरोपी आहे.

याविषयी अधिक माहिती अशी की, बजाजनगरातील हॉटेल मृगनयनीसमोर शुक्रवारी १० वाजेच्या सुमारास एका तरुणास दोन अनोळखी व्यक्ती मारहाण करीत असल्याची माहिती प्रत्यक्षदर्शीनी एमआयडीसी वाळूज पोलिसांना दिली. ही माहिती मिळताच पोलिसांनी घटनास्थळ गाठून पाहणी केली. यावेळी एक अनोळखी तरुण रक्ताच्या थारोळ्यात घटनास्थळी बेशुद्ध पडलेला असल्याचे, तसेच दगडाने त्याचा चेहरा ठेसलेला असल्याचे पोलिसांना दिसून आले. गंभीर जखमी अवस्थेत त्या अनोळखी तरुणास पोलिसांनी उपचारासाठी दाखल केले असता डॉक्टरांनी तपासून त्यास मयत घोषित केले.

फाटे हा सराईत गुन्हेगार

बजाजनगरात दगडाने ठेचून खूृन केलेल्या मयत तरुणाची ओळख पटली असून, त्याचे नाव विशाल ऊर्फ मड्ड्या किशोर फाटे (२७, रा. वडगाव कोल्हाटी), असे आहे. मयत विशाल हा सराईत गुन्हेगार असून, त्याच्यावर एमआयडीसी वाळूज पोलीस ठाण्यात जवळपास गंभीर स्वरूपाचे ७ ते ८ गुन्हे दाखल आहेत. गतवर्षी वडगावातील योगेश प्रधान या तरुणाच्या खून प्रकरणातही विशालचा सहभाग होता. या खूृन प्रकरणात विशाल हा वर्षभर हर्सूल कारागृहात होता. पंधरा दिवसांपूृर्वीच विशाल याची जामिनावर सुटका झाल्याने तो घरी परतला होता.

गँगवारचा वाद पुन्हा उफाळला

वडगाव- बजाजनगरात वर्चस्व प्रस्थापित करण्यावरून गेल्या काही वर्षांपासून दोन गटांत सतत वादविवादाच्या घटना घडत आहेत. गतवर्षी १७ मे रोजी योगेश प्रधान या तरुणाचा चौघा आरोपींनी चाकूने वार करून, तसेच दगडाने ठेचून निर्घृणपणे खून करण्यात आला होता. या खून प्रकरणातील जितेंद्र दहातोंडे, विकास गायकवाड, करण साळे व विशाल फाटे या चौघा आरोपींचा सहभाग असल्याचे पोलीस तपासात निष्पन्न झाले होते. योगेश प्रधान याच्या खुनाचा बदला घेण्यासाठी जामिनावर सुटलेल्या विशाल फाटे याचा मयत योगेश प्रधान याच्या साथीदारांनी दगडाने ठेचून खून केल्याचा प्राथमिक अंदाज पोलिसांनी वर्तविला आहे.

फोटो ओळ-

बजाजनगरात सराईत गुन्हेगार विशाल ऊर्फ मड्ड्या फाटे याचा दगडाने ठेचून निर्घृणपणे खून करण्यात आला असून, घटनास्थळाची पाहणी करताना पोलीस निरीक्षक प्रशांत पोतदार व सहकारी. इन्सेटमध्ये मयत विशाल फाटे.

फोटो क्रमांक-मर्डर स्पॉट फोटो १/२/३/४