अर्धावेळ संपला, ४ तासांत ३० टक्के मतदान;मतदानाचा टक्का वाढविण्यासाठी उमेदवारांची धावपळ

राजकीय पक्ष, संघटनांसह अपक्षांमुळे बहुरंगी निवडणूक होत आहे.

औरंगाबाद: मराठवाडाशिक्षक मतदारसंघ निवडणुकीत आज तब्बल २२६ केंद्रांवर मतदान सुरु आहे. सकाळपासून मतदानास संथ सुरुवात झाली. चार तासात केवळ ३० टक्के मतदान झाल्याने उमेदवारांची मतदारांना केंद्रांपर्यंत आणण्यासाठी धावपळ सुरु आहे. 

राजकीय पक्ष, संघटनांसह अपक्षांमुळे बहुरंगी निवडणूक होत आहे. एकूण १४ उमेदवार असून ६१ हजार मतदार आहेत. मराठवाडाशिक्षक मतदारसंघाची निवडणुक भाजपाने प्रतिष्ठेची केली आहे. राष्ट्रवादी काँग्रेसचे विद्यमान आ.विक्रम काळे यांच्या विरोधात भाजपचे किरण पाटील आहेत. आ.काळे चौथ्यांदा निवडणुकीच्या रिंगणात आहेत. आ.काळे विरूध्द पाटील असे चित्र दिसत असताना मराठवाडा शिक्षक संघाचे उमेदवार सुर्यकांत विश्वासराव यांनी देखील जोर लावला आहे. तसेच राष्ट्रवादी आणि भाजपा दोन्ही पक्षातील बंडखोर किती मतदारांना आकर्षित करतात यावर अधिकृत उमेदवारांचे लक्ष आहे. 

दरम्यान, आज सकाळी महाविकास आघाडीचे उमेदवार विक्रम काळे यांनी लातूर येथे, भाजपचे उमेदवार किरण पाटील यांनी औरंगाबाद तर मराठवाडा शिक्षक संघाचे उमेदवार सुर्यकांत विश्वासराव यांनी कंधार तालुक्यातील प्रियदर्शिनी हायस्कुलमध्ये मतदानाचा हक्क बजावला. सकाळी ८ ते १२ वाजेपर्यंत ३० टक्के मतदान झाले आहे. हीच गती राहिली तर ५० ते ६० टक्क्यापर्यंत मतदान होण्याची शक्यता आहे. २ फेब्रुवारीला चिकलठाणा एमआयडीसीमध्ये मतमोजणी होणार आहे. 

बहुरंगी लढत; १४ उमेदवार रिंगणात
राष्ट्रवादीकडून आ. विक्रम काळे, भाजपकडून प्रा. किरण पाटील, वंचित बहुजन आघाडीकडून कालिदास माने, तर मराठवाडा शिक्षक संघाकडून सूर्यकांत विश्वासराव, अपक्ष म्हणून प्रदीप साेळुंके, मनोज पाटील, संजय तायडे, कादरी शाहेद अब्दुल गफूर, अनिकेत वाघचवरे, नितीन कुलकर्णी, विशाल नांदरकर, प्रा. अश्विनकुमार क्षीरसागर, आशिष देशमुख, ज्ञानोबा डुकरे मैदानात आहेत.

मराठवाड्यातील जिल्हानिहाय मतदार असे......
जिल्हा - पुरुष मतदार - महिला मतदार – एकूण मतदार
औरंगाबाद - ८७०५            - ५२१९ - १३९२४
जालना - ४१८६            - ८५१ - ५०३७
परभणी - ३७९८            - ६७४ - ४४७२
हिंगोली - २५८०             - ४८० - ३०६०
नांदेड - ७००८             - १८१३ - ८८२१
बीड - ७७५०            - २०१९ - ९७६९
लातूर - ८५२७            - २७३७ - ११२६४
उस्मानाबाद - ४२२६             - ९५६ - ५१८२
एकूण - ४६७८० - १४७४९ - ६१५२९