पर्यटकांसाठी पुन्हा खुलले ऐतिहासिक सौंदर्य

बीबी का मकबरा परिसरात पहिले आलेल्या पर्यटकांचे फुले देऊन स्वागत करण्यात आले. आपण आज या ऐतिहासिक क्षणाचे पहिलेवहिले साक्षीदार ठरलो आहोत, याचा आनंदही पर्यटकांच्या चेहऱ्यावर दिसून आला. क्यूआर कोड स्कॅनिंग करून ऑनलाईन माध्यमातून तिकिटे काढूनच पर्यटकांना प्रवेश देण्यात येत होता. प्रत्येक पर्यटकाची अतिशय शिस्तबद्ध तपासणी आणि सॅनिटायझेशन केल्याची खातरजमा करण्यासाठी सुरक्षारक्षक सज्ज होते.

नेहमीच्या तुलनेत पर्यटनस्थळी खूपच कमी फेरीवाले दिसून आले. त्यांच्या वस्तूंची पहिल्या दिवशी विशेष विक्री झाली नाही; परंतु लवकरच आता आपलाही व्यवसाय सुरू होईल, अशी आशा मात्र त्यांना नक्कीच होती.

चौकट :

क्यूआर कोड स्कॅन करताना अडचणी

- वेरूळ लेणी परिसरात सकाळच्या सत्रात जवळपास ३०० पर्यटकांची उपस्थिती होती. दिवसभरातून अंदाजे ५०० पर्यटक याठिकाणी येऊन गेले.

- पहिल्या दिवशी अंदाजे २५० जणांनी बीबी का मकबरा पाहिला, अशी माहिती तेथील अधिकाऱ्यांनी दिली.

- गुरुवारी आलेले बहुतांश पर्यटक हे औरंगाबाद शहर आणि आसपासच्या गावांतून आले होते.

- सवयीचे नसल्यामुळे क्यूआर कोड स्कॅन करून ऑनलाईन तिकीट काढणे अनेकांना त्रासदायक झाले होते. स्कॅनिंग कसे करायचे, ऑनलाईन पेमेंट कसे करायचे, याबाबत अनेक पर्यटक संभ्रमावस्थेत दिसून आले. क्यूआर कोड आणि स्कॅनिंग पहिल्यांदाच होत असल्याने पर्यटनस्थळी असलेली तांत्रिक टीमही पर्यटकांच्या अडचणी सोडविण्यासाठी सज्ज होती.