सरपंच, उपसरपंचांना मानधन, सदस्यांना मात्र केवळ चहापान

ग्रामपंचायतींचे कारभारी : होतकरू गरजू सदस्यांना गरज मानधनाची

---

औरंगाबाद : जिल्ह्यात नुकत्याच ६१७ ग्रामपंचायतींच्या निवडणुका झाल्या. यात अनेक होतकरू आणि आर्थिक परिस्थिती बिकट, पण गावविकासाची आस असलेल्यांना गावकऱ्यांनी कारभारी बनवले. यात सरपंच आणि उपसरपंचपदांना ठराविक मानधन मिळणार, तर तेवढाच वेळ खर्ची करणाऱ्या सदस्यांना मात्र, चहापानावरच समाधान मानावे लागणार आहे.

६१७ गावांच्या ग्रामपंचायतींत ४६९९ सदस्य निवडून आले आहेत. त्यातून ६१७ सरपंच आणि ६१७ उपसरपंच बनले. लोकसंख्येच्या निकषावर या पदाधिकाऱ्यांना १ ते ५ हजार रुपयांपर्यंत मानधन मिळेल. मात्र, ज्या सदस्यांचे रोज काम केले, तरच कुटुंब चालते, त्यांची यामुळे अडचण झाली आहे. अनेकांना ते गावात थांबल्यास त्यांच्या जागेवर मजूर लावावा लागतो. त्याची झळ पोहोचत असल्याने अनेकजण सक्रिय कामातून अलिप्त राहताना दिसत आहेत. त्यामुळे ज्या सदस्यांची आर्थिक परिस्थिती हलाखीची आहे किमान त्यांना तरी मानधन मिळावे, अशी भावना ग्रामपंचायत सदस्यांनी ‘लोकमत’कडे व्यक्त केली.

आमदार, खासदारांना पगार, पेन्शन मिळते; तर गावविकासात गावकऱ्यांच्या सेवेत दिवस-रात्र काम करणाऱ्या सदस्यांना मानधन का नको, असा सवालही गावगाड्याचे कारभारी करायला लागले आहेत, तर ज्यांना गरज नाही, ते नाकारतील, परंतु निवडून आल्यावर प्रोत्साहन भत्ता म्हणून तरी मानधन मिळायला हवे, असे सदस्यांचे म्हणणे आहे.

---

निवडणुका झालेल्या ग्रामपंचायती

६१७

---

निवडून आलेले सदस्य

४६९९

---

सरपंच

६१७

---

सरपंच काय म्हणतात...

--

होतकरू तरुण, शेतकरी निवडणुकीत निवडून आले. ते कामधंदा सोडून गावाच्या विकासासाठी वेळ‌ देतात. त्यांना त्याचा योग्य मोबदला मिळायला हवा. त्यांनाही मानधन मिळाल्यास ते पूर्णवेळ गावाच्या विकासाला देऊ शकतील.

- विशाल गिरी, सरपंच, निंबायती

---

स्वत:चे काम करून गावगाड्याचा कारभार शक्य होत नाही. किमान ज्या सदस्यांची आर्थिक परिस्थिती हलाखीची आहे, त्या सदस्यांना तरी मानधन दिले पाहिजे. ज्यांची आर्थिक परिस्थिती बरी आहे, ते स्वत:हून नाकारतील.

- गजानन ढगे, सरपंच, आमखेडा

---

रोज कमवून जगणाऱ्यांना, पण गाव विकासाची तळमळ असणाऱ्यांनाही नागरिकांनी निवडून दिले. रोजगार बुडवून घरी राहिल्याने त्यांच्या कुटुंबावर त्याचा परिणाम व्हायला नको, पण गावाला त्यांची गरज आहे, अशा सदस्यांनाही कुटुंब चालेल एवढे मानधन मिळावे.

- मनीषा शेळके, उपसरपंच, कुंबेफळ