बीड बायपासवर भीषण अपघात; भरधाव ट्रकने दुचाकीस्वार भावंडांना चिरडले

A horrific accident on Beed bypass : संतप्त जमावाने ट्रकवर दगडफेक करून केबीनच्या काचा फोडल्या.

ठळक मुद्देजमाव ट्रक पेटविण्याच्या तयारीत असतांना पोलीस घटनास्थळी पोहचलेअपघातात मृत दोन्ही तरुण आते- मामेभाऊ आहेत.

औरंगाबाद: कामावर निघालेल्या दुचाकीस्वार दोन तरुणांना भरधाव ट्रकने चिरडल्याची भीषण घटना बायपासवरील नाईकनगर कमानीजवळ बुधवारी दुपारी ३ वाजेच्या सुमारास घडली. या घटनेनंतर ट्रक सोडून चालक पळून गेला. संतप्त जमावाने ट्रकवर दगडफेक करून केबीनच्या काचा फोडल्या. जमाव ट्रक पेटविण्याच्या तयारीत असतांना पोलीस घटनास्थळी पोहचले आणि त्यांनी ट्रक जप्त केला. दोन्ही तरुण आते- मामेभाऊ आहेत.

सचिन कल्याण राठोड (रा. नाईकनगर ,बायपास ) आणि नितेश कुंडलिक पवार (३२, रा. पोरगाव तांडा, ता. पैठण, ह. मु. शिवाजीनगर )अशी मयताची नावे आहेत. दोघे नात्याने आते - मामेभाऊ होते आणि दोघेही देवळाई येथील बाबाशेट यांच्याकडे जेसीबी ऑपरेटर(चालक) म्हणून कामाला होते. या भीषण अपघाताविषयी प्राप्त माहिती अशी की, सचिन आणि नितेश हे आज दुपारी ३ वाजेच्या सुमारास नाईकनगरकडुन झाल्टाफाट्याकडे मोटारसायकलवरून जात होते. नाईकनगर कमानीसमोर ते रास्ता ओलांडून झाल्टाकडे जाणाऱ्या रस्त्यावर आले. याचवेळी देवळाई चौकाकडुन झाल्टा फाट्याकडे सुसाट निघालेल्या मालवाहू ट्रकने त्यांना उडवले. या अपघातात सचिन आणि नितेश यांच्या अंगावरुन ट्रकचे चाक गेले. दोघे गंभीर जखमी झाले आणि रस्त्यावर रक्ताच्या थारोळ्यात बेशुद्धावस्थेत पडले. याघटनेनंतर ट्रकचालक ट्रक सोडून पळून गेला. 

अपघातानंतर जखमी दोघे सुमारे पंधरा मिनिटे तेथे पडून होते. प्रत्यक्षदर्शीनी या घटनेची माहिती पोलीस आणि रुग्णवाहिकेला कळविली. माहिती मिळताच पोलिसांनी घटनास्थळी धाव घेतली तोपर्यंत मयताच्या नातेवाईकही तेथे आले होते. नितेश आणि सचिन यांना तातडीने खाजगी रुग्णालयात दाखल करण्यात आले मात्र तोपर्यंत उशीर झाला होता. रुग्णालयातील डॉक्टरांनी त्यांना घाटी रुग्णालयात नेण्याचे सांगितले. अपघात विभागातील डॉक्टरांनी नितेश आणि सचिन यांना तपासून मयत घोषित केले. या अपघाताविषयी पुंडलिकनगर पोलीस ठाण्यात नोंद करण्यात आली.

संतप्त नागरीकांची ट्रकवर दगडफेक
अपघातानंतर घटनास्थळी सचिन आणि नितेश ला पडलेले पाहुन संतप्त नागरीकानी त्यांना चिरडणाऱ्या ट्रकवर दगडफेक करून नुकसान केले. यावेळी जमाव ट्रक पेटवून देण्याच्या तयारीत होते. मात्र त्याच वेळी पोलीस घटनास्थळी पोलीस पोहोचले आणि त्यांनी जमावाला शांत केले. नितेश आणि सचिन यांना रुग्णवाहिकेतून खाजगी रुग्णालयात पाठविले.

काही काळ वाहतूक कोंडी
अपघातानंतर देवळाई चौकाकडुन झाल्टा फाट्याकडे जाणाऱ्या रस्त्यावर वाहतूक कोंडी झाली होती. वाहतूक शाखेचे निरीक्षक मुकुंद देशमुख आणि गस्तीवरील जवाहरनगर , पुंडलिकनगर पोलीस ठाण्यातील अधिकारी, कर्मचारी यांनी घटनास्थळी धाव घेऊन वाहतूक सुरळीत केली. पुंडलिकनगर पोलिसांनी ट्र्क जप्त केला आणि मयताच्या मोटारसायकल घटनास्थळावरुन हलविली.