‘रूही’तून मिळणार हॉरर कॉमेडीची ट्रीट!

- अबोली शेलदरकर कुलकर्णी

क्वीन, सिटी लाइट्स, ट्रॅप्ड, न्यूटन अशा हर तऱ्हेच्या चित्रपटात काम करणारा हरहुन्नरी अभिनेता म्हणजेच राजकुमार राव. रोमँटिक, बायोपिक, कॉमेडी, हॉरर अशा अभिनयाच्या प्रत्येक वाटेवर चालणारा हा अष्टपैलू अभिनेता. ११ मार्च रोजी प्रदर्शित होणाऱ्या ‘रूही’ चित्रपटातून राजकुमार राव प्रेक्षकांच्या भेटीला येणार आहे. यानिमित्ताने त्याच्याशी केलेले हितगुज...

१. ‘रूही’ चित्रपटात तुझी भूमिका कशी आहे?

- या चित्रपटात मी भवरा हे पात्र साकारतोय. भवरा हा रूहीच्या प्रेमात पडतो. मात्र, रूही हिच्यात एक चेटकीण देखील असते. कहाणी पुढे सरकत असताना भवरा कसा घटनांमध्ये अडकत जातो आणि त्यातून तो कसा बाहेर पडतो, हे सर्व पडद्यावर पाहणेच प्रेक्षकांना धम्माल अनुभव देणारे आहे.

२. ‘रूही’च्या कथानकात अशी कोणती गोष्ट आहे जिने तुला प्रभावित केले?

- रूही हा चित्रपट एक हॉरर कॉमेडी आहे. यापूर्वी मी स्त्री हा हॉरर कॉमेडी चित्रपट केला होता. स्त्री चित्रपटाला बॉक्स ऑफिसवर चांगलाच प्रतिसाद मिळाला होता. त्यामुळे या चित्रपटाची ऑफर येताच मी ती स्वीकारली. मला हॉरर कॉमेडी या प्रकारच्या चित्रपटात काम करायला खूप आवडतं.

३. वरूण आणि जान्हवीसोबत सेटवर वातावरण कसे होते?

- सेटवर आम्हा सर्वांमध्ये खूप मस्ती, धम्माल चालायची. वरूण आणि जान्हवी दोघेही माझे खूप चांगले मित्र आहेत तसेच उत्कृष्ट कलाकार आहेत. आम्ही सर्वांनी चित्रपटावर खूप मेहनत घेतली आहे.

४. ‘स्त्री’नंतर पुन्हा एकदा हॉरर कॉमेडी...काय वाटते प्रेक्षकांच्या प्रतिसादाबाबत?

- आम्ही खूप उत्सुक आहोत. आम्हाला वाटते की, प्रेक्षकही चित्रपट पाहण्यासाठी उत्सुक असतील. थिएटरमध्ये जाताना फक्त मास्क घालून जा आणि ती धम्माल अनुभवा.

५. दिग्दर्शक हार्दिक मेहता यांच्यासोबत काम करण्याचा अनुभव कसा होता ?

- क्वीन, टॅप्ड चित्रपटांपासून मी हार्दिक यांना ओळखतो. ते माझे चांगले मित्र आहेत. कोणत्याही प्रोजेक्टवर ते खूप मेहनत घेतात. त्यांच्याकडून बरंच शिकायलाही मिळतं.

................................................

पूजा सावंत दिसतेय स्टनिंग

आपल्या अभिनयाने आणि सौंदर्याने रसिकांच्या मनात अभिनेत्री पूजा सावंतने वेगळे स्थान निर्माण केले आहे. तिने मराठी चित्रपटसृष्टीसोबतच बॉलिवूडमध्येसुद्धा आपल्या अभिनयाची छाप उमटविली आहे. सध्या ती एका डान्स शोमध्ये परीक्षक आहे. यासोबतच ती सोशल मीडियावरही बरीच सक्रिय असते. तिने नुकतेच एक फोटोशूट शेअर केले आहे. लाल रंगाच्या ड्रेसमधील या फोटोशूटने सगळ्यांचं लक्ष वेधलं आहे. या वेगळ्या अंदाजातील ड्रेसमध्ये पूजा स्टनिंग दिसतेय. या फोटोंमधील तिच्या अदा कुणालाही घायाळ करतील अशाच आहेत.

..................

नॅशनल क्रश करणार बॉलिवूडमध्ये एंट्री

दाक्षिणात्य सिने इंडस्ट्रीतील प्रसिद्ध अभिनेत्री आणि नॅशनल क्रश म्हणून ओळखली जाणारी रश्मिका मंदाना ‘मिशन मजनू’ या चित्रपटाद्वारे बॉलिवूडमध्ये पदार्पण करीत आहे. रश्मिकाने सिद्धार्थ मल्होत्रासोबत लखनऊमध्ये या थ्रिलर चित्रपटाचे शूटिंग सुरू केले आहे. जेव्हापासून या चित्रपटाची घोषणा झाली तेव्हापासून हा चित्रपट चर्चेत आला आहे. या चित्रपटात १९७० सालच्या पाकिस्तानमधील भारताच्या धाडसी मोहिमेची कथा आहे, ज्याने दोन्ही देशांमधील संबंध कायमचे बदलले. दाक्षिणात्य सिने इंडस्ट्रीत उल्लेखनीय आणि अविस्मरणीय भूमिका केल्यानंतर आता रश्मिकाच्या बॉलिवूड पदार्पणावर सगळ्यांचे लक्ष आहे.